Eskimologip taaguutini tulluusimaarutiginngilaa
Ilisimatusarnera tamaat ilinniakkatta ”eskimologi”-mik taaguuteqarnera akerleriuaannarsimavara. Allanilli isumallit ilaat oqaluttarput ilinniagaq taamatut taaguutilik sumut tunngasunik ilinniarfiunersoq ilisimaneqareermat taaguutip attatiinnarnissaa pingaartillugu, soorlu aamma kalaallit ilinniagartuut siulliit ”eskimolog”-itut ilinniarsimasut. Nalunngilara maannakkut ikinnerussuteqarlunga, periarfissarli takkuppat allanngortitseqataarusuppunga. Nunanimi allani angalaninni allat sammillugit ilisimatusarsimasut ilinniakkatta taaguutaat tusaraangamikku ileqimisaartortuinnaallutik eqqumiigisaqimmassuk, Lill Rastad Bjørst oqarpoq.
Københavnip universitetiani ”Eskimologimik issittumilu pissutsinik ilisimatusarfimmi” siunnersortaasoq, Frank Sejersen, oqarpoq, Lill Rastad Bjørst-ip eqqarsariaatsit pigiliutiinakkat akiorniaatigalugit imminut ”Eskimolog”-itut taasariaqarnera tulluartuunngitsoq.
Frank Sejersen aamma isumaqarpoq oqaaseq ”eskimo” nikaginnippaluttutut nipeqartoq, erseqqissarluguli sammisatik politikkimut tunngappata, inunnik isumaginninnermut kulturimulluunniit tunngappata, aningaasaqarniarnermut namminersulerniarnermut imaluunniit nunarsuarmioqatigiit atassuteqaqatigiinnerannut tunngagaluarpata, issittumi pissutsit ilisimatusarfigigalugit. Taama siammasitsigisut sammisarigatsigit ukiut arlallit qaangiuttut isumaqatigiinnikuuvugut ilisimatusarfipput ”Eskimologi”-ginnarmik taaguuteqassanngitsoq, uiggiuteqassasorli; ”..issittumilu pissutsinik” ilisimatusarfik. Minnerungitsumik ilisimatusartut oqaaseq ”Eskimologi” tigummiinnarusussimavaat, ilisimatusarfinni allani aamma ”issittumi pissutsit ” sammisarmatigit. Kalaallit Nunaanniikkaangatta ”Eskimologi”-millu ilinniagaqarneraraangatta, inuit suna pineqarnersoq naluneq ajorpaat, nikanartutullu isigisarnagu. Inuilli isumaqarpata oqaaseq nikaginnippaluppallaartoq taava oqaatsip taassuma atuinnarnissaa soorunami eqqarsaatigeqqittariaqarparput, Frank Sejersen naggasiivoq.
Frank Sejersenip naqissuserpaa oqaaseq ”Eskimologi” inunnik immikkoortitsiniarnertut paasineqassappat tamanna oqaatsit ”eskimo” imaluunniit ”inuk” atorneqaraluarpat, ilisimatusartunit ilinniartitsisuinillu inunnut sammineqartunut ataqqinninneq ilisimasaqarnerlu millinavianngitsoq.
Akilinermi inuit eskimonik taagorneqarusunngillat, massa alaskamiut oqaaseq ”Inuk” taaguutigerusunngikkaat.
Nammineq illit qanoq isumaqarpit ? Nittartakkatsinni KNR.gl-imi qanoq isumaqarnerit naapertorlugu taaseqataasinnaavutit.
