Eskimolog: ICC pisortanit tapiiffigineqanngikkuni ingerlasinnaanngilaq
Mads Fægteborg issittumi inoqqaat pillugit ukiorpassuarni sulisimavoq. Naalakkersuisut ICC pillugu sipaarniuteqarnerat eqqarsaatigeqqeqquaa.
-Nunap inoqqaavi inuillu piginnaatitaaffii pillugit inuinnaat aningaasanik tuissuteqarneri kisiisa tunngavigalugit suliniaqatigiiffinnik ingerlatsisoqarsinnaanngilaq. ICC taamatut matuneqassappat Kalaallit Nunaat Issittumilu inuiaqatigiit allat tamarmik naleqartitaminnik annaasaqassapput. Ukiuni arlalinni nunap inoqqaavisa piginnaatitaaffii pillugit suliniuteqarsimanera, FN-imi kiisalu Issittoq pillugu Siunnersuisooqatigiinni sullissinera tamaanngaannartinneqassapput. Tamanna Kalaallit Nunaata kisimi annaasaqaatigissanngilaa, Issittumili inuiaqatigiit tamarmik annaasaqassapput, soorlu Ruslandimi Sovjet piungallarmat tamaani nunap inoqqaavisa ICC maligassiorteralugu namminneq kattuffeqalernikuusut ilanngullugit eqqarsaatigalugit.