Eskimo Pelsiusimasoq pisiariniarneqalerpoq

februaarip 02-at 2006 09:58

Narsami ammeriviusimasoq Eskimo Pels qaammatit pingasut matuma siornagut akiliisinnaajunnaarluni matusoq, tassani pisortaasimasup Sheila Koldingip pisiariniarpaa. Eskimo Pelsimik tigusinissamut isumaqatigiinniarnerit kinguneqarluassappata ammerivik marsip aallaqqaataanniit ammaqqissinnaasasoq, Sheila Kolding oqarpoq. Tamatumuuna qanormita ingerlakkumavaa?

- Eskimo Pelsimik siornagut ingerlatsimaneq suliffeqarfiup ingerlanerliulerneranut pissutaaqataasimavoq, taamaatumillu massakkut nutaarluinnarmik periuseqarluata ingerlatsiniarpugut. Siornatigut allat suliaannik tuniniaanermik kiisalu sinerissami pisiniarfiit aqqutigalugit tunisaqartarnermik tunngaveqarluta ingerlatsisimavugut, massakkulli tunisassiassat oqaluttuassartaat ilanngullugit tunisassiussaagut, soorlu puisit amiinik pisisut maani nunami pisap amianik pisinerannik ilisimatinneqartassapput, Sheila Kolding oqarpoq.

Pisisartut sunik pisinerminnik pingaartitsisut immikkkut tikinniarneqarput.

Eskimo Pelsi aappassaannik matuvoq, tamannali namminersorluni ingerlatserusunnerminut ernumanartoqartinngikkini Sheila Kolding erseqqissaavoq.

- Tunisassiassat allatut suliarineqarnissartik pissutigalugu naleqquttumik akeqassapput, tassa sulianit naliginnaasunit akisunerulaassallutik.

Great Greenland, Eskimo Pelsiusimasup akiligassaqarfia, Sheila Koldingip nutaaliorluni tunisassiorumaneranut tapersersuiumasoq suleqatiginnikkumasorlu piginnittunngortussaq unnersiorpoq.

Eskimo Pelsi namminersortunngorpat tassani sulisuusimasut amerlanersaat, tassa tallimat arfinillilluunnit sulisoriumagini, Sheila Kolding oqarpoq.