Puisit amiinik mersortarfik Eskimo Pels oktobarimi 2005-imi akiliisinnaajunnaarluni matusoq nutaanik piginnittoqalerpoq.
Ingvar Rohde-p ukiorpassuarni Narsami sulisitsisuusimasup aammalu ruujoorilerisup Jim Petersen–ip piginnittuulernissamut allagartat atsioriaannanngorsimasut ullumi tiguaat.
-Piffiissaq sukkanerpaaq atorlugu Eskimo Pels matunerata siornatut ilillugu ammaqqissavarput, Ingvar Rohde nuannaaqisoq oqarpoq.
Mersortarfimmi pisortaanerusimasup Sheila Kolding-ip, qaammatini tallimani kingullerni tamaviaarluni suliffeqarfik pisiariniaraluarpaa.
-Ugguaqaanga pakatseqalungalu. Siorna oktobarip 13-ani Ingvar Rohde-p ilisimatippaanga, suliffeqarfimmik pisinissamut soqutiginninnerluni nalullugu. Kisianni maanna piffissaq kingullerpaaq atorlugu, pisinissamut neqeeroorutiga qaangerlugu neqerooruteqarsimavoq, Sheila Kolding oqarpoq, qanorli atsigisumik neqerooruteqarsimanini oqaatigiumanagu.
Nuna Advokat-ini Inatsileritooq Anders Lønvig, Eskimo Pels-ip pigisaanik paarsisunngortitaasimasoq oqarpoq, neqerooruteqartitsigamik Ingvar Rohde Jim Petersen-ilu ajugaasimasut.