Erseqqissumik inerniliisoqanngilaq
Tamatumunnga taarsiullugu ataatsimiititaliaq avammut nalunaaruteqartinnani Inatsisartut siulittaasoqarfiannit allagaatinik tigusaqarnissaminik utaqqimaaqqaarniarpoq.
- Kuupik Kleistip arlalinnik akissuteqarfigaatigut, tamatumalu pisariaqalersippaa, Inatsisartut siulittaasoqarfiannit amerlanerusunik paasissutissinneqarnissarput, kukkunersiuinermut ataatsimiititaliap siulittaasua IA-meersoq Naaja Nathanielsen Radioaviisimut oqarpoq.
Taamatut isumasioqatigiittoqarpoq, qinikkat soqutigisaminnut tunngatillugu innuttaasunut ammanerunissaannik anguniagaq, sumut killinnersoq paaserusunneqarmat. Tamannami ukiut marluk matuma siornagut qineqqusaarnerup nalaani oqallisaaqaaq, maannamulli tigussaasumik iliuuseqarfigineqarani. Tassami aatsitassanut naalakkersuisup Ove Karl Berthelsenip suliffeqarfimmi assartuinermik ingerlataqartumi Kamma ApS-imi piginneqataanera, KNR-imit saqqummiunneqareersorlu, pineqartoq soqutigineqarnerulermat.
Ullumikkut isumasioqatigiinneq tunngavigalugu, Inatsisartut kukkunersiuinermut ataatsimiititaliaa sapaatip akunnerata tulliata qiteqqunnerani ataatsimeeqqissaaq, tassa paasissutissat pisariaqartinneqartut pissarsiarineqareeriarapata.
Tamatuma kingorna qinikkat aningaasarsiornikkut soqutigisaat pillugit siunissami ammanerunissamut iliuutsit naammannersut nalilersuiffigineqassaaq.