Ernini naalungiarsuk annersarmagu ukiuni pingasuni pineqaatissinneqarpoq
Angutip 34-inik ukiullip ernini naalungiarsuusoq, siullermik pingasunik qaammateqartoq, tullianilu arfinilinnik qaammateqartoq sakkortuumik annersarsimavaa. Aviisi Sermitsiaq.ag nittartakkamini taamatut allaaserisaqarpoq.
Angut taanna tarnimikkut innarluuteqartut angerlarsimaffianni ulloq unnuarlu najugaqarfiusumi Nuummiittumi sulitilluni aamma sullitami ilaat arnaq tarnikkut nappaateqartoq kinguaassiuutitigut atornerluttarsimavaa.
Arnaq atornerlunneqartoq tarnikkut nappaammik Skizofreni-mik nappaateqarpoq taamatullu napaateqarnera atornerlullugu angutip 34-inik ukiullip arnaq taanna qaammatit marluk ingerlaneranni quleriarlugu atoqatigisarsimavaa. Angutip taassuma politiinit tigusarineqarnermini ikiaroornartumik hashmik 0,045 graminik tigumiaqarmat poliitinit tigusarineqarpoq. Ikiaroornartup haship annikinnera pissutigalu eqqartuussisut eqqartuussinerminni pineqatissiinngillat.
Angutip eqqartuunneqarnerani, arnamik tarnimigut nappaatilimmik atoqateqartarsimanera pillugu ukiup affaanik sivisutigisumik pinerluuteqarsimasunut inissiisarfimmiittussanngorlugu pineqaatissinneqarpoq, ernerminik naalungiarsuusumik sakkortuumik annersaarsarsimanera pillugu ukiunik marlunnik affarmillu sivisutigisumik pinerluuteqarsimasunut inissiisarfimmiittussanngorlugu pineqaatissinneqarpoq.
