Erninerup kingorna aliatsarujussuartarneq ilisimaneqarpianngilaq
Arnat taamatut misigisaqartut ilisimasaqarfiginerunissaat pikkoriffiginerusariaqarparput, Peqqissaasut marluk maanna Danmarkimi paasisassarsiorlutik angalasut isumaqarput.
Nunarsuatsinni kisitsisit ilisimaneqartut naapertorlugit, maani Nunatsinni ernisut 10 procentii ernereernerup kingorna aliatsarujussuarnermik eqqusaasartussatut ilimagineqarsinnaagaluarpoq, taamaattoqarpasiganili? Tamanna sumik pissuteqarnersoq paasiniarlugu Danmarkimi illoqarfimmi Thistedimi, Nunatsinnit Peqqissaasut marluk, Iben Motzfeldt aamma Sabina Andreasen paasisassarsiorlutik maanna angalapput.
Sabina Andreasen oqarpoq ilimagalugu ernereernermi aliatsarujussuartarneq paqumigineqarluni oqallisaannginnera ilisimaneqannginneranut peqqutaasimasinnaasoq:
- Maannakkut ilisimanngilarput arnat qasserpiaat ernereernermik kingorna aliatsaqqajaanermik eqqugaasarsimanersut. Ilimagaarpulli paqumigineqarluni tamanna oqaluttuarineqarneq ajortoq, Peqqissaasoq Sabina Andreasen oqarpoq.
Nuummi ernisut akornanni arnat aliatsarujussuaqqanermik misigisartut taamaallaat amerlanerpaamik marluk paasineqartarput. Taakkuli tassaasarput arnat ilinniarluarsimasut, nukittuut qallunaat arnat.
Nunani allani kisitsisit ilisimaneqartut naapertorlugit Nunatsinni aamma taamatut amerlatiginissaat Peqqissaasunit takorloorneqaraluarpoq.
- Arnat ernereernerisa kingorna angerlarsimaffinnut takusaagaagatta paasitinneqarneq ajorpugut kingunerlutsitsisoqartarnersoq. Kisitsisit ilisimaneqartut naapertussagaanni ilimagisinnaavarput Nuummi ernisartut 200-t missaanniittut 10 procentii ernereernermi kingorna aliatsarujussaqqanermik eqqorneqartassasut, Sabina Andreasen oqarpoq.
Kisiannili tassa taamaattoqarpasinngilaq.
Peqqissaasut Sabina Andreasen aamma Iben Motzfeldt isumaqarput ernereernerup kingorna aliatsarujussuaqqaneq kalaallinit arnanit isertuunneqartarunartoq, tamannali suli iluamik uppernarsineqanngitsoq Peqqissaaasut naqissuserpaat.
Sabina Andreasen aperaarput arnanik aliatsarujussuaqqasunik naammattoorsisimanersoq, taannalu ima akivoq.
- Arnat arlaleriarlutik meerartaarsimasut ilaasa kingusissukkut ilisimatittarpaatigut aliatsarujussuarnermik misigisaqarsimallutik, tassalu aatsaat kingusinaareerluta tamanna paasisarlutigu, Nuummi Dronning Ingridip Napparsimmavissuani Peqqissaasoq Sabina Andreasen oqarpoq.
Aprilip aallaqqaataa aallarnerfigalugu Dronning Ingridip Napparsimmavissuani ernisussat tamarmik misissorneqarnissaminnut periarfissinneqartalissasut Peqqissaasut Iben Motzfeldtip aamma Sabina Andreasenip aamma oqaatigaat.
