Erninermi sulinngiffeqartarneq sivitsoqquneqarpoq

oktobarip 04-at 2004 09:34

Erninermut atatillugu sulinngiffeqartarnerup sivitsorneqarsinaanissaanut ilaqutariinnermut naalakkersuisoq suleqatigiissiataliorniarpoq.

Ilaqutariinnermut peqqissutsimullu naalakkersuisup Asii Chemnitz Narupip suleqatigiissitaliorniarnerminut tunngavigaa erninerup kingorna sulinngiffeqartarneq sivitsussammat kiisalu erninermi sulinngiffeqartarneq pillugu inatsisartut peqqussutaata iluarsaateqqissammat.

Suleqatigiissitaliaq misissugassani suliassanilu allat suliarereernigit inerneri majip aallaqqaataani aappagu tunniussissaaq, peqqussullu nutaaq 2006-mi atuutilertussatut siunnersuutigineqassaaq.

Ilaqutariinnermut naalakkersuisup inatsisartuni ilaasortat marluk erninerup kingorna sulinngiffeqartarnerup sivitsorneqarnissaannut siunnersuutaat itigartinneqassasut inatsisartunut kaammaattuutigaa.

Ruth heilmannip siumumeersup sulinngiffeqartarnerup sapaatit akunnerini arlalinnik sivitsuiffigineqarnissaa kiisalu marlulisut aamma sivisunerusumik sulinngiffeqartarnissaat siunnersutigaa.

Palle Christiansenip Demokraatineersup erninermut atatillugu sulinngiffeqartarneq ikinnerpaamik qaammatinik arfinilinnik, angajoqqaallu ikinnerpaamik qaammatinik pingasunik sivisussuseqalissasoq siunnersuutigaa.

Siunnersuuteqartut taakku marluk peqqussutip allanngortinneratigut sivitsuisoqarnissaa naalakkersuisutuulli kissaatigaat, naalakkersuisulli akissuteqarnermigut sivitsuinermi aalajangersimasumik sivisussusiliinngilaq, taamaammat siunnersuutit itigartinneqarnissaat naalakkersuisup kaammattuutigaa.

Suleqatigiissitaliassaq pisortaqarfinni arlalinni sulinngiffeqartarnermut attuumassuteqarsinnaasulinni atorfilinnit inuttaqassasoq ilaqutariinnermut naalakkersuisoqarfimmi pisortap Bo Catswillerip radioaviisip oqaatigaa.