Erninermi sulinngiffeqarneq sivitsorniarneqarpoq

Qineqqusaaneq aallartilerpoq. Partiillu qineqqusaarutaat neriorsuutit pitsaasorpassuit atuarneqarsinnaapput.

IA-kkut Demokraatillu naalakkersuisunngortitsissagaluarpata sivisunerusumik erninermi sulinngiffeqartoqartalissagaluarpoq.

Terkel Lethip qineqqusaarutit misissorpai:

Erninermi sulinngiffeqartarnerup sivitsorneqarnissaa pingaartillugu partiit taakku marluk qineqqusaarutigaat.

Malittarisaassat atuuttut malillugit angut sapaatip akunnerini pingasuni ernisitsinerup kingorna sulinngiffeqartarpoq arnarlu sapaatip akunnerini 15-ini sulinngiffeqartarluni.

Erninermi sulinngiffeqartarneq sapaatip akunnerinik aqqanilinnik sivitsorneqarnissaa pilersaarutaannguatsiarpoq. Taamaalilluni arnaq sapaatip akunnerini 26-ini, ukiup affaani, sulinngiffeqartarsinnaavoq.

Naalagaaffiit peqatigiit peqqinnissakkut suleqatigiiffiata tamanna innersuussutigaa meeraq iviangimmit milutsinneqarniassammat.

Erninermi sulinngiffeqarnissap sapaatip akunnerinik aqqanilinnik sivitsorneqarnissaanik aningaasaqarnermut inatsisissaq isumaqatiginniutigineqarmat Demokraatit IA-kkullu isumaqatigipput.

Tamatumalu kingunerisaanik naalakkersuisooqatigiit isasoorput suleqatigiikkunnaarlutillu. Taamaalimmallu qinersinissaq aalajangiunneqarluni.

Taamatu piareersarneq akikitsuinnaaneq ajorpoq. Sulisitsisut pisortallu aningaasarpassuarnik akiliisussaassapput.

Erninermi sulinngiffeqartarneq ukiumut 18,5 millioni koruuninik immikkut siunissami landskarsimit aningaasaliiffigineqartassaaq.

Demokraatit siulittaasuata Per Berthelsenip millionerpassuit sumit pissanerlugit oqaatigerusunngilaa.

Taamaattorli akileraarutit akitsuusiinikkullu akileraarutit qaftarneqarnissaat siunnertarinngilaa. Aningaasat allatigut sipaarneqarlutik pineqarsinnaanerarpai.

- Aningaasaqarnermut inatsimmi aningaasaliissutissat allatut inissinneqarnissaat isumaqatiginniutigineqarsinnaavoq, Per Berthelsen taama oqarpoq.

Josef Motzfeldt IA-meersoq oqarpoq aningaasat pissarsiarineqarsinnaasut pisortat aningaasaliiffigisartagaannik allanngortitsisoqarneratigut. Aningaasaqarnermut inatsisissatut siunnersuummi aningaasat immikkoortiterneqarneri innersuussutigai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat