Erniat tamakkiisumik ilanngaataalernissaannut illuatungiliuttut isumaqatigiinngillat

- Namminerisamik illuuteqarnermut taarsigassarsiat erniaannik ilanngaatiginnissinnaanerup killiliiffigineqarsimanerata, Naalakkersuisut siuliinit atuutilersinneqartup kingunissai Naalakkersuisooqatigiit ernummatigilluinnarpaat.

Saqqummiussami aamma imatut allassimasoqarluni.

- Eqqaamasariaqarpoq inuit nammineerlutik ernianut akiliutigisartagaasa ilarpassui illuuteqarnermut attuumassuteqarmata. Namminerisamik illuuteqarnerup patajaatsuunissaa kissaatigigaanni, tamannalu Naalakkersuisooqatigiit kissaatigaat, akileraartarneq pillugu politikki anguniakkamut tassunga akimmisaarutaannginnissaa pingaartuuvoq.

Inuit Ataqatigiit aamma Demokraatit Naalakkersuisooqatigiinnerisa nalaanni ilanngaat tassa appartinneqaraluarpoq. Partiilli taakku ullumikkut isumaqatigiikkunnaarsimapput. Naaja Nathanielsen, Inuit Ataqatigiit siulliulluni ima oqarpoq.

- Ilanngaammik allanngortitsinermi Nunatta karsia 12 millionn koruuninik annaasaqarnissaa ajuusaarnarpoq. Taakkumi allanut atorluarsinnaakutsooraluarmata. Ilanngaatip tamakkiisunngornerani inuiaqatigiit pigissaarnersut iluaquserneqarput, soorlu namminerisamik illutaarnermi, biilitaarnermi umiatsiartaarnermilu. Tassalu tamannarpiaavoq Inuit Ataqatigiit isumaqatiginngisaat, Naaja Nathanielsen oqarpoq.

Demokraatit Naalakkersuisuunerminni ilanngaatip appartinneqarneranut akuerseqataapput, naak partiip talerperliup tamanna politikkiani allassimanngikkaluartoq.

- Uangut Naalakkersuisuutilluta ilanngaatip annikillisarneqarnissaanut isumaqataavugut, tassami Naalakkersuisooqatigiinnermik ataqqinnittariaqaratta.

Demokraatit siulittaasuat, Jens B. Frederiksen oqarpoq imalu nangilluni.

- Kisianni tassa ilanngaatip tamakkiisunngortinnissaanut massakkut isumaqataavugut tassami tunngaviusumik Demokraatit ilannaatip tamakkiisunngortinneqarnissaanut politikkeqaratta.

Jens B. Frederiksen oqarpoq naqissusserlugulu, inuit namminerisaminnik illuuteqartut inuiaqatigiinnut artukkiinngimmata, tassami taakku illuutaat pisortanit allaffissornikkut ingerlanneqartussaanngimmata.

Naaja Nathanielsenip eqqaamaqquaa, ilanngaatip 100 procentimiit 90 procentimut ilanngarneqannginnerani misissuisoqarsimammat, illuuteqartut sisamaagaagata pingasut aningaasanik aningaaserivinni attartornerminni akileraarutitigut allannguinikkut iluanaaruteqartoqartarmat, ilaannaallu qaammammut 100 koruuninik ikinnernik annaasaqartarmata.

- Ilanngaatip appartinneratigut illuutillit aningaasatigut artukkerneqanngillat, killormut oqaraanni tamanna eqqunngilaq. Ilanngaatillu 100 procentimiik 90 procentimut ilanngarneqarneranni illuutillit artukkerneqarsimappata, taava taakku aningaasatigut ajornartorsioreersimassapput, Naaja Nathanielsen oqarpoq.

Taassuma taama isumaqarneranut Jens B. Frederiksen ilaatigut isumaqataagaluarluni, ilanngaatip tamakkiisunngortinneqarnissaanut isummani allangortinngilaa.

Ilanngaatip tamakkiisunngorteqqinneqarnissaanut saqqummiussaq Inatsisartut ualeq manna oqalligisaat akuerineqartussatut isikkoqarpoq, naak ullumi tamanna pillugu oqallinneq siullermeerinerugaluartoq.