Erngup nukissiorfiliornissaq akikillisaataassaaq

Qasigiannguit, Aasiaat Kangaatsiallu kommuneqarfiini inuussutissarsiutit inerisartariaqalerput, taama Inuit Ataqatigiit inatsisartuni ilaasortai marluk Ane Hansen aamma Aqqaluk Lynge naalakkersuisunut allapput. Qasigiannguit eqqaanni erngup nukinganik nukissiorfiliortoqarnissaa siunnersuutigaat.

Qasigiannguit eqqaanni tatsit arlaleriarlutik misissuiffigineqareersut Ane Hansenip erseqqissarpaa.

- Qasigiannguit kujatinnguanni tatsit, Orpissuup tasia aamma Kangersornup tasia, erngup nukinganik nukissiorfiliorfiusinnaasutut misissuiffigineqartareerput, taamaattumillu Naalakkersuisut isummertariaqalerput, Ane Hansen oqarpoq.

- Kujataani Sisimiunilu erngup nukinganik nukissiuuteqarfiliorniarnerit aallartereerput, taamaattumik pissusissamisuussaaq Qeqertarsuup Tunuata innaallagissamik akisoreeqisumik atuilluartartunik aalisakkerivillip eqqarsaatigineqalernissaa, Ane Hansen oqarpoq.

Kommunini pineqartuni inuussutissarsiutit ukiuni kingullerni arfineq-marlunni ineriartortinneqarsimanngillat, naak arlalissuarnik isumaliutersuuteqartoqartaraluartoq. Taamaattumik piviusunngortitsisoqassappat, Qasigiannguit eqqaanni erngup nukinganik nukissiorfiliornissap ukiuni tulliuttuni tallimaniit qulit tikillugit piviusunngortinniarneqarnissaanut piffissanngortoq Ane Hansen oqarpoq.

Nammineq Aqqaluk Lyngelu qineqqusaarnersut aperineqarami akivoq:

-Qineqqusaaraluarutta qineqqusaanngikkaluaruttaluunniit uagut qinigaasugut pinngitsoorata suliarisariaqakkatsinnik suliassaqarpugut. Ukiuni makkunani innaallagissamik atuinitsinnik qanoq ililluta akikillisaasinnaanerput pillugu annertuumik oqallinnitsinni pissusissamisoorpoq akikillisaataasinnaasunik nutaanik ujartuinissarput, Ane Hansen oqarpoq.

Qasigiannguit eqqaanni nukissiorfiliornissap aallartinneqarnissaa Inatsisartut ukiaru ataatsimiinnissaannut siunnersuutigineqassasoq Ane Hansen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat