Erngup nukinganik innaallagissiorfissaq akuersaarneqarpoq

Qallunaat suliffeqarfiutaata Pihl og Sønnikut Ilulissani erngup nukinganik innaallagissiorfissaq sanasusanngorpaat. Innaallagissiorfiliassaq 2013mi naammassineqartussaq Aningaasaqarnermut ataatsimiitsitaliap akueraa. Aningaasaqarnermut Ataatsimiitsitaliap siulittaasua Naaja Nathanielsen ima nassuiaateqarpoq:

- Kalaallit Nunaanni erngup nukinganik innaallagissiorfiliornissaq isumassarsiatsialaavoq tapersersortariaqartoq, Aningaasaqarnermut ataatsimiitsitaliami siulittaasoq Naaja Nathanielsen, IA-meersoq oqarpoq.

Taassuma nassuiaatigaa innaallagissiorfiliassaq missingersuutinit 6 million kronenit akikinnerussammat naalakkersuisut qinnuvigisimanerarlugit sillimmateqarfimmut nuunneqarnissaannut qinnuteqaqqullugit. Aammali uparuagassaqarnerarput:

- Pinngortitamut avatangiisinullu tunngatillugu nalilersukkat ilaatinneqarnissaat piumasaqaatigaagut, naalakkersuisullu neriorsorpaatigut innaallagissiorfiliornissamut atatillugu isumaqatigiissummut ilanngunneqarumaartut, Naaja Nathanielsen oqarpoq.

Erngup nukinganik innaallagissiorfiliassamut naalakkersuisut immikkoortitsisimapput, sulili aaliangiussimanngilaat sanaartugassaq qanoq aningaasalersorneqassasoq.

Tassa Erngup nukinganik innaallagissiorfissaq privatinik akilerneqarluni sananeqarsinnaavoq, naammassippallu ukiuni aaliangersimasuni ingerlakkallarsinnaavaat Namminersorlutik Oqartussanut tunniunneqarnissaata tungaanut.

Taamaasiornikkut nunatta karsiata 600 millioni koruuninik imaqartuarnissaa qulakkeerneqarsinnaasoq aningaasaqarnermut naalakkersuisoq Palle Christiansen oqarpoq. Erniaalu taamaasillutik inuiaqatigiit ingerlanneqarnerannut atorluarsinnaanerarlupai.

Ilulissat eqqaanni erngup nukinganik innaallagissiorfissaq 652 million kroneqartussaavoq.