Erngup nukinganik innaallagissiorfik pilersuileqqippoq – sulili eqqanaarsartariaqarpugut
Erngup nukinganik innaallagissiorfimmut Utoqqarmiut Kangerluarsunnguaniittumut aqqutaani kabeli anorersuarnerani ajutooreersorlu, Nuuk ataasinngornermi unnukkut aqqarnup missaani innaallagiaaruppoq. Marlunngornermilu ualinissaata tungaanut, tassa nalunaaquttap akunnerini 18-ini aalaakkaasumik innaallagiaqarani. Ajutoornermut suna peqqutaarpiarnersoq misissorniarlugu Nukissiorfiit aqagu misissuiartortitsissaaq.
Innuttaasut anorersuarnissaanut eqqanaarsareertariaqarput
Mobilinut batterilersuutit powerbankinik taaneqartartut immeriikkit, dunkit allallu imermik immereerneqarsinnaasut immikkit, kialaarutissamillu tippimik piareersimatitaqarit. Kalaallit Nunaanni Politiit tusagassiutinut nalunaarumminni innuttaasunut taama kaammattuipput.
AAMMA ATUARUK Politiit: Amerlasuuni innaallagiaqaleqqippoq, innaallagiarli qameqqissinnaavoq
- Anorersuaq innaallagissamik, imermik, kiassarnermillu pilersuinermut ajornartorsiortitseqqeratarsinnaavoq, Kalaallit Nunaanni Politiit taama allapput.
Oqarasuaatitigut attaveqaatit suli tamakkiisuunngillat
Nuummi innaallagiaarunnerani nunarput tamakkerlugu oqarasuaatitigut attaveqarniarnerit internetilu aamma eqqorneqarput, innuttaasullu ullup ilarujussua attaveqarsinnaanatik. Ualisorli attaviit nalinginnaaneruleqqipput. Taamaakkaluartoq attaveqaatit aalajangersimasut inuit siarngunnerisa nalaani akornusersorneqarsinnasut, Tusassip ilanngullugu marlunngornermi unnukkut nalunaarutigaa. Taamaattoqartillugu arlaleriarlutit sianernissat Tusassimit aamma kaammattuutigineqarpoq.
Qatserisartunut attaveqarfissaq 113, ullup ilarujussua aamma attaveqarsimanngitsoq iluarseqqippoq. Normulu 112 aqqutigalugu sianernikkut upalungaarsimanermik suliaqartut suli attavigineqarsinnaasut politiit nalunaarutigaat.
AAMMA ATUARUK Nuummi innaallagiaarunneq: Kommuni utoqqarnut sanngiinnerusunullu ikiuisinnaasoq
Pingasunngornermi anorersuarnerani oqarasuaatitigut attaveqaatit kipisaqattaalissagaluarpata, tamanna Tusassip atuisunut SMS-ikkut nalunaarutigissavaa.
Pisariaqartitsinermi kommunimut orniguffissaq atorunnaarsinneqarpoq
Innuttaasut pisariaqartitsivissut, soorlu utoqqaat sanngiinnerusullu kiassarnikkut, imeqarnikkulluunniit ajornartoortut kommunip innuttaasunut sullissivianut ornigullutik imaluunniit 367281-imut sianerlutik saaffiginniffissaanik, Kommuneqarfik Sermersooq marlunngornermi pilersitsivoq. Illoqarfiulli innaallagiamik pilersorneqarnera tamakkiisunngoqqimmat saaffiginniffissaq taanna matuneqarpoq. Taarsiullugu, ikiorneqarnissaminnik pisariaqartitsisut socialvagtimut saaffiginninnissaat kommunimit nalunaarutigaat.