Erngup atoriikkap kuuffii taarsertariallit
Illuni inissianilu erngup atoriikkap kuuffii pisoqqat Namminersornerullutik Oqartussanit Kommuneqarfik Sermersuup tiguai, nuussinermilu aserfallatsaalineqarsimannginnerannut aningaasaliisoqanngilaq. Illuni inissianilu erngup atoriikkap kuuffiisa iluarsaannissaannut kommune ukiumut 11 aamma 14 millionit koruunit akornanni aningaasaliiffigineqanngippat, kuuffiit pineqartut illoqarfinni pingasuni taaneqartuni innuttaasunut akornutaalersinnaasut, kommunep nittartagaani allaaserinnittoqarpoq.
- Illuni inissianilu erngup atoriikkap kuuffii iluarsaatinngikkutsigik, taava pisoqaliartuinnalissapput, piffissarlu ungasinnerusoq isigalugu tamanna innuttaasut peqqissusaannut akornutaalersinnaavoq, teknikkimut avatangiisinullu pisortaagallartoq Jan Karlsson oqarpoq.
Illuni inissianilu erngup atoriikkap kuuffii pisoqalisimaqisut iliuuseqarfiginiarlugit, Namminersornerullutik Oqartussat 2004-mi ukiumut 30 millionit koruuninik aningaasaliisalerput. Taakkua ukiunut tallimanut ataatsimoortumik aningaasaliissutaapput, ukiormannalu aningaasaliineq pisussaalluni. Ukiuni taakkunani kuuffiit pineqartut aserfallakkaluttuinnarput, ilaatigut putusoortarlutik, allatullu ajornartumik tuaviortumik iluarsaanneqartariaqartarlutik.
Namminersorlutik Oqartussat kommunillu, ukiuni tulliuttuni tallimani atuuttussamik isumaqatigiinnialeruttorput. Illoqarfinni taaneqartuni pingasuni illuni inissianilu erngup atoriikkap kuuffii ajornartorsiorfiussanngippata, Kommuneqarfik Sermersuumit isumaqartoqarpoq, ukiumut 11 aamma 14 millionit koruunit akornanni aningaasaliisoqartariqartoq.