Erngunnerit meeqqanik eqquipput

Ilulissani inuit aamma qaammammusinerat saniatigullu akileraarutinik utertoortoqarnera peqqutaaqataallutik Ilulissani politiit sapaatip akunnerata naanerani ulapaarsimapput.

Politiit ulapaarnerat inuttaasut imigassartorsimanerannik pissuteqartoq, Ilulissani politiit ittuat  Karl Vinther nassuiaavoq.

- Imigassartorsimasut ulapitsitsipput, Ilulissani politiit ittuat Karl Vinther oqarpoq.

Sapaatip akunnerata naanerani politiit sulisut pisarnertut amerlassuseqarput, kisianni ullut taakkua sulisut ulapaarsimaqaat.

Angerlarsimaffinni eqqissiviilliornerit meerartallit tallimaasut politiit suliaraat. Sapaatip akunnerata naaneraniinnaq pingasut nalunaarutigineqarlutik.

- Immikkut taakkua nalunaarsortarpagut, inunnik isumaginnittoqarfik aamma taamaattoqartillugu atassuteqarfigineqartarmat, politiit ittuat Karl Vinther oqarpoq.

Nakuusernerit sisamat
Imigassartorsimanermik pissuteqartumik nakuusersimanerit sisamat aamma nalunaarutigineqarput.

- Inoqatiminnut annersaasunik nalunaarutiginnittoqarpoq. Kisianni taakkua tamakkiisumik suli paasisaqarfiginngilakka , Karl Vinther oqarpoq.

Sapaatip akunnerata naanera Ilulissat politiiannut ulapaarfioriarluni ullumikkut ataasinngonermi pissutsit eqqisisimasutut oqaatigineqarsinnaalerput.