Erneriit qalipakkaminnik saqqummersitsisut
Kalaallit erneriit eqqumiitsuliortut, angutaa tassaasoq palasi soraarneq, atuakkiortoq, eqqumiitsuliortoq aamma qalipaasoq Karl-Peter Andersen erneralu eqqumiitsuliortoq qalipaasorlu Nicolai Andersen Olsvig, Ålborgemi Kalaallit Illuutaanni qalipakkaminnik ippassaq saqqummersitsipput takuniaasunit najuuffigineqarluartumik.
- Meeraaninni inuusuttuaraaninnilu misigisarsimasakka suli eqqarsaatinnikkamik, taava piniartut periaasiat, uumasut, qaannat, qalipannerusarpakka, ernerma qalipattarpai nutaajunerusut, Karl-Peter Andersen oqarpoq.
Erneriit siusinnerusukkut qalipaanikkut suleqatigiittareerput.
- Arlaleriarluta suleqatigiittarnikuuuvugut, kisianni immikkut tamatta qalipagaqarluta, aamma Aasianni inissiarsuit silatai suliaarinikuuavut.
Karl-Peter Andersenip nuannaarutigaa ernini eqqumiitsuliornerup tungaatigut suleqatigisinnaasaramiuk.
- Assorsuaq nuannaraara, meeraallunili qalipaasunga isiginnaartaraminga saninnut ingilluni, sunaaffa isumassarsiorfigalugu aallartittoq, assorsuaq tanngassimamarutigaara, Karl- Peter Andersen oqarpoq.
