Ernereernerup kingorna sulinngiffeqarneq suliunnaarallarsimasumut akisusinnaavoq
Isumaqatigiissusiorsimannginnera sulisitsisup sulisullu akornanni aaqqiagiinngissuteqarnermi ajornartorsiutaalersinnaavoq, matumani sulisumut ajornartorsiutaalersinnaalluni.
Tamanna Paninnguaq Petersenimut ernereernerup kingorna sulinngiffeqarnermini suliunnaarsitaasumut akisuvoq.
Nuummiu Paninnguaq Petersen ernereernermi kingorna upernaaq manna sulinngiffeqalerpoq. Ernereernermi kingorna qaammatialunnguit qaangiummata Nuuk Centerimi pinnguaarniarfimmi Legekædenimi siornatigut Legelandiusimasumi ukiuni marlunni suliffigisimasaminut saaffiginnippoq, sulileqqinnissanilu naatsorsuutigisimagaluarlugu tassanili, sulisunilli amigaateqartoqanngitsoq paasitinneqarpoq:
- Qaammatit arfinillit missaanni qaangiummata aperiartorpunga qaqugu uteqqissanerlunga, ilumut uteqissanerlunga, tava sivitsoreersoq akivaanga atorfissaqartinngikkaanga, uteqqissangilangagooq, Paninnguaq Petersen oqarpoq.
Pinnguaarniarfik Legelandimik siornatigut taaguuteqarpoq, Paninnguulli ernereernerminut atatillugu sulinngiffeqarnermi nalaani Legeland tunineqarpoq, Legekædenitullu taaguteqalerluni.
Legelandiugallarmat piginnittup Anne Marie Hviid Kristensenip, Legekædenimillu piginnittup Marie Berthelsip marluullutik oqaatigaat Paninnguaq Petersen sulilluartarsimasoq, Legelandimili sulisut, maannalu Legekædenimi sulisut sulilernermi isumaqatigiissummik atsiugaqarneq ajortut.
Legelandiugallarmat sulisut namminneq aalajangerpaat nutaamut ikaarsaarnermi tassani suli sulerusunnerlutik, Marie Berthels oqarpoq:
- Uanga isumaqarpunga arlaatigut unioqqutitsinanga pissutigalugu nutaajugatta. Pinnguaarniarfik aatsaat pisiareqqammerparput, sulisut kikkuussanersut kikkuussannginnersulluunniit pillugu isumaqatigiissuteqartoqanngilaq, Nuuk Centerimi pinnguaarniarfimmik Legekædenimik piginnittoq Marie Berthels oqarpoq.
Paninnguaq Petersen soraarsitaasimasutut misigisimavoq, suliarlu SIK-mut ingerlateqqissimallugu. SIK-p siulittaasua Jess G. Berthelsen oqarpoq suliaq tigusimallugu, suliarli ingerlammat annertunerusumik oqaaseqarfigerusunnagu.
Sulisitsisup sulisullu akornanni allakkatigut isumaqatigiissusiorsimanngippat aaqqiagiinngissuteqarnermi ajornartorsiutaalersinnaavoq, sulisumut matumani ajornartorsiutaalersinnaalluni.
Ajornartorsiullu taanna SIK-mit eqqumaffigineqarpoq:
- Atorfininnermut atatillugu soorunami pingaaruteqarpoq isumaqatigiissusiornissaq, kisianni atsiugaqartoqarsimanngippat atsiugaqartoqarsimanngippalluunniit isumaqarpunga uani suliassamut tunngatillugu pitsaasumik inissisimalluta, SIK-p siulittaasua Jess G. Berthelsen oqarpoq.
Paninnguaq Petersen ernereernermi kingorna Legekædenimi suleqqilissanersoq, suleqqilissannginnersorluunniit, Marie Berthelsip ilisimasimanagu oqaatigaa, Legelandiusimasorlu Legekædeninngormat sulisut allat sulisorilersimanerarlugit.
