Ernereernerup kingorna ajornartorsiutit katsorsaavissaqalissapput

- Ernereernerup kingorna ajornartorsiutaasinnaasut oqaluuserivallaarneq ajorpagut, ernisussiortoq Esther Hammeken oqarpoq.

Taamaammat erninermut atatillugu misiginerluttarnermik katsorsaavissamik pilersitsinialerpoq.

Esther Hammeken ukiuni 22-ni ernisussiortuusimavoq, ukiunilu kingullerni psykoterapeut-itut ilinniarsimalluni.

Ilinniarnerup nalaani erninermut atatillugu misiginerluttarnermik katsorsaaneq annertunerusumik samminnilluni.

Misiginerlunneq siornatigut erninerup kingorna nikallunganermik taaneqartartoq.

Nikallunganeruinnaanngimmalli, oqaaseq nikallunganeq qimakkiartuaarneqarpoq.

Ernereernerup kingorna ajornartorsiutit eqqartussallugit tunuarsimaarutiginnittarneq, ilisimanninngippallaarnerlu qaangerusuppai.

- Ernisussiortutut sulininni arnanik naapitaqartarpunga ajornartorsiutiminnik oqaloqatiginnissinnaasimanngitsunik, Esther Hammeken oqarpoq, nangillunilu:

- Erninermi kingorna qanoq ingerlariaqqinnissaminnik nalornisut naapittarpakka, erninermullu atatillugu misiginerluttut qanoq qisuariartarnersut nunatsinni ilisimanngilarput. Qanga oqartoqartarsimavoq arnaq una immaqa amigakujulersimasoq, Esther Hammeken oqarpoq.

Tarnip pissusaannik ilisimasalimmik oqaloqateqartarnissaat innersuussutigiinnarneqartarsimagaluarpoq, Esther Hammekenili allamik neqerooruteqarsinnaalluni oqarpoq:

- Timi eqqissisarlugu katsorsaanerit, eqqumiitsuliortitsinerillu aqqutigalugit eqqissisaanerit katsorsaatitut neqeroorutigisinnaavakka, Esther Hammeken naggasiivoq.

Esther Hammekenip Danmarkimi Gaia Institutimi ilinniarnini novembarimi naammassissavaa.

Katsorsaavissani kinguninngua ammarumaarpaa.