Ukiup ataatsip ingerlanerinnaani kuultinik, aligoqqinnik erlinnartunillu allanik ujarlersut piginneqatigiiffiit marloriaatinngungajassimapput.
Massakkorpiaq nunatsinni sumiiffinni assigiinngitsuni 35-ini – avannaani Uummannamiit, kangiani Tasiilamut kujataanilu Nanortalimmut suliffeqarfiit erlinnartunik ujarlertartut ulappupput, allallu akuerineqarnissaminnut utaqqiinnarput.
Siorna ujarlernerit 19-iupput, ukiormannalu marloriaatinngungajallutik 35-ulerput. Aatsitassaqarnermut qullersaqarfimmit allaffimmi pisortap Søren Hald Møller-ip amerleriarnerinut pissutaasut arlaqarnerarpai. Assersuutigaalu Canada-p kangisissuata nunattalu kitaata sananeqaatai assigiipput, taamaammat tasamani ujarlernerni nassaartoqaraangat naatsorsuutigineqartarpoq nunatta kitaani aammattaaq assinganik peqassasoq, taamaattumik 1998-imiit ujarlernissaminnik qinnuteqartut amerliartulersimapput.
NunaMinerals-ip nunatsinneersup saniatigut aatsitassarsiortoqatigiit Australiamit, Canadamit
Tuluillu Nunaanneersut ujarlertuupput. Kangerlussuup eqqaani aligoqqimmik ujarlerneq pimoorunneqarnerooq. Nuup eqqaani kuultimik, Kujataanilu aammattaaq kuultimik, nikkel-imik allanillu suliffissuaqarfinni atortussiassanik ujarlertoqarluni.
Søren Hald Møller-ip naggataagut erseqqissaatigaa ujarlerniarlutik qinnuteqartut amerligaluartut oqartoqarsinnaanngikkallartoq ujarlertut qassit piiaanissaminnik aallartissanersut.