- Aallakaatitassiaq nuannersorujussuussaaq, KODA-p Kalaallit Nunaanni siunnersortaa, Inunnguaq Petrussen oqarpoq.

Erinniortunut taalliortunullu nersornaasiuttakkat arfininngorpat tunniunneqassasut

KODA-p erinniortunut taalliortunullu nersornaasiuttagai arfininngorpat Januaarip ulluisa 16-ianni tunniunneqassapput. Nersornaasiinerli ukioq manna allaannerussaaq. ÎVA, Varna aamma Pukuut nersornaasigassatut innersuunneqarput.

Aaqqissuussat assigiinngitsut covid-19 peqqutigalugu siorna taamaatinneqarput. 

Nipilersornerup silarsuaani akissarsititsisarneq sunnerneqartunut ilaavoq. Nersornaammik tigusisussat siornamut sanilliullugit ukioq manna marloriaammik amerlanerussapput. 

Ukioq manna innersuunneqartut:

- ÎVA

- Varna

- Pukuut

- Corona pillugu, nersornaasiisoqartussaagaluartoq, kinguarteqattaarnikuugami. Taava massakkut 2021-mi ukioq aallartilaartoq ataatsikkoortillugit nersornaasiiginnassaagut, KODA-p Kalaallit Nunaanni siunnersortaa, Inunnguaq Petrussen oqarpoq.

KODA-milu nersornaasiinissamut covid-19 peqqutigalugu sunniutaa ersarittoq, taassuma ilanngullugu eqqaavaa.  

- Sunniutaa ersarilluarpoq. 2020-mi saqqummersitsinikut amerlasoorujussuupput. Tassa angerlarsimaannarlutik immiusseqattaarsimagamik, Inunnguaq Petrussen oqarpoq. 

AAMMA ATUARUK Hip hop elektronikkimillu nipilersortartut nersornaaserneqartut

Nipilersortartut nipilersoqatigiittartullu pingasut ukiumut nersornaammut innersuunneqarput.

Tassa ÎVA, Gustav Lynge Petrussen aamma Josef Tarrak-Petrussen. Tassani nipilersoqatigiillutillu erinarsoqatigiipput. Nipilersoqatigiit Rhythm'n'blues (R&B), rappernermik elektronikkimillu nipilersoriaaseqarput. Kalaallisullu erinarsorlutik. 

Nipilersoqatigiit Pukuut aamma innersuunneqartunut ilaapput. Taakkulu sakkortuumik guitarernermik nipinillu elektronikkiusunik nipilersoriaaseqarput. Innersuunneqartullu pingajuat tassaavoq: Varna, Marianne Nielsen. Taanna erinniortuuvoq erinarsortartuullunilu. 

Allat aamma innersuunneqartut

Ukioq 2019-imullu nersornaaserneqartussatut innersuunneqartut tassaapput:

Gerth Lyberth erinarsorlunilu guitarertartoq. Josef Tarrak-Petrussen, rapperluni nipilersortartuunerminut aamma nersornaasigassatut innersuussanut ilaavoq. 

Innersuunneqartullu pingajuattut Rasmus Lyberth, erinniortuullunilu taalliortoq. Taanna nunatsinni 1970-ikkunnili eqqumiitsuliortuni nipilersortarnermigut tusaamaneqarnerpaat ilagaat.   

Nersornaasiineq ukiut siulianit allaanerulaassaaq. KODA siornaak siornalu pisunut ataatsikkut nersornaasiissaaq.

Ukioq manna nersornaasiinissaq allatut aaqqissuuneqaraluartoq, qilanaarutissaqartoq, Inunnguaq Petrussen oqarpoq.

- Aallakaatitassiaq nuannersorujussuussaaq, Inunnguaq Petrussen oqarpoq.

AAMMA ATUARUK Nipilersortartunut nersornaatit Sisimiuni tunniunneqassasut

Ukiumut nersornaatit saniatigut, isumalluarnartumut nersornaat ataqqinaammillu nersornaat tunniunneqassapput. Taakkua ukioq allortarlugu tunniunneqartaraluarput. Ukiulli marluk ataatsikkut nersornaasiiffiussammata ukioq manna ataatsikkut tunniunneqassapput.

Nersornaasiinerlu KNR-ikkut malinnaaffigineqarsinnaassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat