Erinarsoqatigiit Tivolimi
Erinarsoqatigiit Aavaat augustip aallaqqaataani Tivolimi tusarnaartitsinissaminni kalaallit erinarsortatut talliortullu nuannarineqarluartut atugaannik tusarnaartitsissapput. Tusarnaartitsissutigineqartussallu ilaatigut Rasmus Lyberthip Per Berthelsenillu taalliaraat.
-Tusarnaartitsinissarput pisarnermit allaanerussaaq, tusarnaartummi erinarsoqatigisinnaassavaatigut. Taallammi atugassagut isiginnaaruterujussuakkut saqqumatsinneqassapput. Tusarnartitsinissatsinilu Rasmus Lyberthip nipilersortartuinik ingiorneqassaagut. Qularutiginngilaralu tusarnaartitsinitsinni tusarnaarianit nuannannersuaqassasoq, erinnammi atugassagut nuannarineqassaqaat, Erinarsoqatiginni siulittaasoq Carsten Siegstad oqaluttuarpoq.
Aavaat tusarsnaartitsinerisa saniatigut aamma kalaallit nipilersortartut ilisarisimaneqarluartut tusarnaartitsissapput. Taakkualu ilagaat Sussat, Nanook, Small Time Giants, Inuit Feet aamma Aviaja Lumholdt nipilersortartuilu.
-Tusarnaartitsinissatsinni Naalakkersuisunit kulturikkut suliaqarluarsimasutut nersornaaserneqartup Ole Kristiansenip erinarsugaanik aamma atuiniarluta aaliangersimavugut. Taassumalu aamma saniatigit Qullissani aamarutissiorfiup matuneranit ukiut 40-t qaangiunneranni nalliuttorsioqataaniarluta Vajkat nipilersortartuisalu atugaannik aamma atuissaagut, Carsten Siegstad tusarnaartitsinissamut erinisoqisoq taama oqaluttuarpoq.