Erinarsoqatigiit "Inngeratsiler" nersorneqarput

oktobarip 29-at 2004 08:47

Tasiilami erinarsoqatigiit "Inngeratsiler" Juullip Nipitittagaata siulersuisa isumaqatigiillutik kulturikkut nersornaasigassatut aalajangiuppaat. Nersornaammik tunisisup, erinarsoqatigiinnik aqutsisuusartup Per Rosingip oqalugiaatimini oqaatigaa erinarsoqatigiit Tasiilarmiut tusarningaaramik qatsussassaanngitsut.

- Anersaakkut piorsarsimatsikkullu, aamma nunatta avataani nunatsinnik ilisarititsisarnermikkut, inuiattut isigineqarnitsinnik siuarsaaqataapput. Nipit oqimaaqatigiinnermik, ippinnaateqanngitsumik erngaalanermik, qanilaarpaluttumik, qamannga pisumik ersarissusermik ilisarnaatillit nersorniarneqarnissaminnut piukkunnarluinnartut, tusartuaraluarlugit qatsussinnaanngisagut.

Inngeratsiler sinnerlugu nersornaammik tigusisut ilaasa, Mikael Sanimuinaap, Julia Jonathansenip Aangiiuk Jonathansenillu nersornaammik tunineqarnertik ima oqaasertalerpaat:

- Nuanneqaaq, soorlu erinarsorneq kajumminnarseqqiinnartoq. Allat nersornaasigaasut takujuaannarlugit Inngeratsiler qutsannaqaaq. Aamma isumaqarpugut Inngeratsilip toqqarneqarnissaanut pissutissaqartoq. Nunarput tamaat tusaamaneqarpugut, juullilernerillu tamaasa radiokkut tusaaneqartuaannarluta.

Tasiilami erinarsoqatigiit ingerlanerini nunani allani angalasarnermikkut ilisarisimaneqarput, erinarsukkaminnik juullisiutinillu katillugit arfinilinnik saqqummersitsinikuullutik.

Inngeratsiler ukiut 22-issaat peqatigiiffittut ingerlapput. Juullip nipitittagaata nersorinnissutaa 15.000 koruuninik aningaasartaqarpoq.