Erinaq Shaman nersorniarneqarpoq
Erinniortartup Mads Lumholtip erinniaa Shamanimik qulequtalik Nordisk råd-imiit nersorniarneqarpoq.
Erinaq Shaman kalaallisuunngorlugu angakkumik taaneqarsinnaasoq ukiut tulleriit 2004-imi 5-imilu kulturisiorluni pikialaartitsisoqarneranut atatillugu avanersuarmiorpalaartumik isiginnaagassiatut suliarineqarpoq.
Maannalu taanna nersorniarneqalerpoq kalaallit kulturikkut ineriartornerannut aqqutissiuisutut isigineqarluni.
- Akunnerpassuit atorlugit suliaavoq, immikkuullarilluinnartumik qaqutigooqisumillu kalaallisut nipilersuusiaasoq, nordisk råd tusagassiutinut nalunaarummini taama allappoq.
Erinnap isiginnaagassiaatigisup Shaman-ip suliarineqarnerani nipilersortartut sisamat tassalu kalaallit belgiamiut Islandimiullu suleqatigiinnerisigut pilersinneqarpoq.
Belgiamiu Jan De Vroede siuttoralugu nunat avannarlermiut pikialaartitsimmata nipilersortartut taakku imminnut naapipput, taamaalillutillu aamma maanna suleqatigiillutik.
Jan De Vroede oqaluttuarpoq, Nunafondip Keep-illu aningaasaliinerisigut nutaanngorsaallutik erinniorsinnaanngorsimallutik, taamaattumillu taakkuullutik maanna Danmarkimi naapipput erinaq Shaman ineriartortikkumallugu.
Erinnat suliarineqarsimasut katillugit aqqaneq-marluk Nordisk råd-imit nersorniarneqarput. Mads Lumholt-ilu tamanit ajugaassaguni 350.000 koruuninnassaaq.
