Erik Jensen Siumumi siulittaasuuginnassaaq. Taanna taasisunit 68-ini 39-nit taaguunneqarpoq.

Erik Jensenip unammillertai Siumumi siulittaasuusimasoq Kim Kielsen aamma Aki-Matilda Høegh-Dam Folketingimi ilaasortaasoq 13-init 16-inillu taaguunneqarput.

Siumut Qasigiannguani ataatsimeersuarpoq.

- Nuannaartorujussuullungalu attortippunga, partiip siulittaasuatut qinigaaqqittoq KNR-imut oqarpoq.

- Inuiaqatigiinni partiimilu toqqissisimanermik pilersitsinissamut uannut maanna pingaarnerpaalerpoq.

Piffissap siulittaasuuffiup aappassaa

Erik Jensen taamaalilluni piffissami siuliuttaasuuffimmi aappassaanik siulittaasuusussanngorpoq.

Taanna Siumumi siulittaasutut 2020-mi novembarimi ataatsimeersuartoqarnerani siullermik qinerneqarpoq.

Vivian Motzfeldt taamani aamma siulittaasunngorniarpoq. 

IA-p naalakkersuisoqatiginera

Siumup Inuit Ataqatigiit siorna apriilimi naalakkersuisooqatigilerpaa. IA-p Naleqqallu suleqatigiinnerata ajutoornerata Erik Jensenillu Siumumi siulittaasunngornerata kinguneranik Inuit Ataqatigiit naalakkersuisoqatigilerpaat.

Erik Jensen partiimi isumaqatigiinngissutaasumik isumaqatigiissutissarsiorpoq. Siumup nunatsinni aatsitassanik piiaanissamut akuersisuuvoq – aamma naak piiarneqartoq uranimik akoqaraluartoq akuersilluni. Tamatumanilu IA isumaqataanngilluinnarpoq – IA-p uranimik piiaanissamut inerteqquteqarluinnarnissap 2021-mi februaarimi qinersisoqarnerani ajugaanermi kingunitsianngua Inatsisartuni atuutilersippaa.

Siumullu tamanna IA naalakkersuisoqatilerniarlugu akueraa.

- Siumut Naalakkersuisunut iserumalluni tupissutigisinnaasaminik allaat iisigunarpoq, politikkut ukiorpassuarni malinnaasoq, Kaj Kleist KNR-imut oqarpoq.

IA Siumullu ataatsimoorlutik Inatsisartuni 22-nik qinigaatitaqarput.