- Naalakkersuisut pinaaseratik paasissutissiisartussaammat taanna ajornartinneqartussaanngilaq. Erik Jensen oqarpoq.Assi: Merete Lindstrøm

Erik Jensen nipisattassiissutit pillugit: Naalakkersuisut ilungersunarput

Kukkunersiuinermut ataatsimiititaliap Naalakkersuisut nipisattassiissutinut tunngatillugu suliamut paasissutissiisimannginnerat pillugu isornartorsiorpai. Inatsisartulli suliaq maanna oqallisigisussanngoraat, Erik Jensen oqarpoq.

- Soorunami sakkortuvoq, aamma imaannaanngilaartut oqariartuutigineqarput. Taannalu peqquteqarpoq, paasissutissat ilaasa pissarsiariniarneri, akissutissallu pissarsiariniarneri ilungersunarsimammata.

Kukkunersiuinermut ataatsimiititaliap ilaasortai

 

Siulittaasoq: Erik Jensen, Siumut.

 

Siulittaasup tullia: Aqqa Samuelsen, Inuit Ataqatigiit.

 

Ilaasortaq: Malene Vahl Rasmussen, Demokraatit.

 

Ilaasortaq: Pele Broberg, Partii Naleraq.

 

Ilaasortaq: Aleqa Hammond, Nunatta Qitornai.

Inatsisartut Kukkunersiuinermut ataatsimiititaliaata siulittaasua, Erik Jensen (Siumut) oqarpoq.

Kukkunersiuinermut ataatsimiititaliap nipisattassiissutinut suliamut atatillugu nassuiaatini piffissami sivitsortumi utaqqineqartoq tunniuppaa.

AAMMA ATUARUK Revisionsudvalget rejser skarp påtale af Kielsen i stenbidersag

Nassuiaammi Naalakkersuisut siulittaasuata, Kim Kielsenip (Siumut) nipisattassiissutit qaffaassivigeqatigigamigit tamatumalu saniatigut umiatsiaminik aalisartumut attartortitsigami attuumassuteqarpallaarsimannginnersoq pineqarpoq.

Kukkunersiuinermut ataatsimiititaliap siulittaasuata nassuiaatertik KNR-imut itinerusumik maanna nassuiaatigaa.

Ataatsimiititaliammi misissuilernerannit qaammatit pingasut qaangiupput.

Piffissarli ilungersunangaatsiaqattaarsimasoq, Erik Jensenip nassuiaatigaa.

Naalakkersuisut paasissutissanik ingerlatitseqqinnissamut illersuisimasut

- Qinnuteqaratta paasissutissat piniakkagut pissarsiarinngilagut, taava inatsisilerituut akunneranni paaseqatigiinniarnerit ingerlapput, taava aatsaat aappassaani piumaffiginninnermi paasissutissat ilai pissarsiaraagut, akissutillu tamakkiisuunngillat. Kisianni paasissutissat tamakkiisumik pissarsiarisimannngilagut, tamanna isornartutut naqissuserlutigit saqqummiuppagut, Erik Jensen oqarpoq.

Eqqartuussissusilerisut suliffeqarfiat, Poul Schmith sooq suliamik misissuisussanngortinneqarnersoq kukkunersiuinermut ataatsimiititaliap ilaatigut paaserusussimagaluarpaa. Naalakkersuisut eqqartuussissusilerisut suliffeqarfiannut namminneerlutik suliassanngortitsipput.

AAMMA ATUARUK Eqqartuussissuserisoqarfik: Kielsen nipisattassanut suliamut attuumassuteqarpallaanngilaq

Kim Kielsen nipisattassiissutinik qaffaanissamut suliamut attuumassuteqarpallaartuunngitsoq eqqartuussissuserisup inerniliissutigaa. Kukkunersiuinermut ataatsimiititaliap tamanna isornartorsiorpaa:

- Kammeradvokatip sunaana suliassarisimagaa? Qanoruna suliakkersimaneqarsimasoq? Sooruna taamatut inerniliussamik suliaqartoq? Sooruna paasissutissat ilai pissarsiarineqarsimanngitsut aallaavigalugit taamatut ingerlatsisoqarsimasoq?

Uparuaanerit isumaliutigeqquneqartullu Inatsisartunut maluginiaqquneqartut

 

Kukkunersiuinermut ataatsimiititaliap oqaaseq ”sakkortuumik uparuarpaa” nassuiaatiminni atorniarlugu aalajangerpaa, suliamilu immikkut maluginiagassat isumaliutigeqqullugit.

 

Oqaaseqaatit taakku ataatsimiitaliap naliliinermi oqaaseqaataata allattorsimaffiani qaffasinnerpaamik sakkortunerpaamillu inissisimapput.

1. Assut/assorsuaq ajunngitsutut isigaa 

2. Ajunngitsutut isigaa

3. Naammaginartutut isigaa/ naammagaa

4. Tikkuarpaa/erseqqissaatigaa/ kaammattuutigaa/ naatsorsuutigaa

5. Ajuusaarutigaa/ ernumanartoqartippaa/ isumakulunnartoqartippaa

6. Naammaginartinngilaa/ naammaginngilaa/ erseqqissaatigaa

7. Isoraa/ isornartoqartippa/ sakkortuumik uparuarpaa/ aamma erseqqissaatigaa

8. Uparuarpaa/ sakkortuumik uparuarpaa

9. Sakkortuumik uparuarpaa Inatsisartunullu immikkut maluginiaqqullugu

 

Tusarfik: Inatsisartut. 

- Tamakkua nassuiaammi ersarissumik allaqqapput, taakkulu pillugit apeqqutit apuuttaraluarpagut, kisianni akissutit pissarsiariniarneri ajornartorsiutigisimavagut.

Taama ingerlasoqartussanngikkaluartoq

Kukkunersiuinermut ataatsimiititaliap siulittaasuata ataatsimiititaliap suliaqarniarnerani ilungersunartitai Inatsisartut maanna misissuiffigissagaat kaammattuutigaa.

 - Naalakkersuisut pinaasertarnerat taanna pinngitsoortinniarlugu piumasaqarpugut. Inatsisartummi tassaammata Naalakkersuisut sulinerannik nakkutilliisussaatitaasut, taannalu malinneqassappat taava soorunami pinaasertoqarani paasissutissallu piumasarineqartut tunniunneqartarnissaat taanna inissaminiittussaavoq.

- Naalakkersuisut pinaaseratik paasissutissiisartussaammat taanna ajornartinneqartussaanngilaq.

Ataatsimiititaliaq aalajangiinngitsoq

Ataatsimiititaliarli suliani aalajangiineq ajorpoq, eqqartuussisutullu inissinneq ajorluni. Aamma Kim Kielsen attuumassuteqarpallaarsimanersoq attuumassuteqarpallaarsimannginnersorluunniit pillugu isumminngilaq.

Ataatsimiititaliap isornartutut naliligai kinguneqassanersut Inatsisartut aalajangissavaat. Nassuiaallu Inatsisartunut maanna tunniunneqareertoq, kukkunersiuinermut ataatsimiititaliaq paasissutissiivoq.

AAMMA ATUARUK IA nipisattaassiissutinut suliaq pillugu: Kukkunersiuinermut ataatsimiititaliap misissuinera pingaarneruvoq

Nassuiaat tamaat uani atuarsinnaavat.

KNR-ip Naalakkersuisut siulittaasuat, Kim Kielsen (Siumut) apersorniaraluarpaa. Taannali Kukkunersiuinermut ataatsimiititaliap nassuiaataanut piffissami matumani oqaasissaqanngitsoq, Naalakkersuisut siulittaasuata naalakkersuisoqarfia mailikkut allappoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat