Erik, Jens, Mala Aputsiarlu angummik ipinissamit annaassinertik pillugu akissarsitinneqartut

Erik Palo Jacobsen, Jens Blidorf Frederiksen, Mala Johnsen politiinilu ikiorti nukappiaqqap 18-inik inorlugit ukiullip 2021-mi apriilip ulluisa pingajuanni ipingajanneranit annaassinermut tamarmik immikkut 2.000 koruuninik akissarsitinneqarput.

Nuummi politiit qajartartumit inuusuttumit sianerfigineqarput, taassuma ikinngutimi qajaa kivisimasoq ikinngutinilu imaaniittoq oqaatigaa. Nukappiaraq saaffiginnittup qajaanut najummatsersimavoq.

Kalaallit Nunaanni Politiit taama nalunaaruteqarput.

Erik Palo Jacobsen annaassiniarnermi ingerlatsivoq, taanna umiatsiaminik qajartortut ajornartooqqasut ornippai.

Politiit oqarnerat naapertorlugu taassuma politiini ikiorti Aputsiaq Hansen Jens Blidorf Frederiksenilu nangaariarnani aavai, tamatumalu kingorna nukappissat inuusuttut tungaannut ingerlaalerlutik.

Imaanit nillertumit annaanneqartut

Jens Blidorf Fredeirksen annaassiniarneq tamaat politiini ikiortimut ikiuupput. Taanna ajornartooqqasut sumiissusaannik ilisimannittuullunilu umiatsiamut ilaalluni nukappiaqqanut qaqitsiartoqataavoq.

Mala Johnsen umiatsiami annaassiniariartortumut ilaareerpoq, nukappiaqqanillu imaanit nillertumit qaqitseqataalluni.

Politiit ikiortaat, Aputsiaq Hansen politiitut ilinniarsimasut suliarisinnaasaatut suliaqarnerminut aamma akissarsitinneqarpoq.

Politiinit nersualaarneqartut

Kalaallit Nunaanni Politiit oqarnerat naapertorlugu inuit taakku sisamat namminneq isumannaatsuunissartik ulorianartorsiortillugu sila imaatigullu pissutsit sakkortugaluartut annaassiniarput.

- Annaassiniarnerat pissutigalugu pisoq alianartumik kinguneqanngitsoq qularutiginngilara politimesteri, Bjørn Tegner Bay akissarsititsinermi oqarpoq.

- Pisimasoq taanna nammineq umitsiaatillit ujaasinermi annaassiniarnermilu qanoq iluaqutaatigisarnerannut aamma assertuutissaavoq.