BILLEDER Erik Bjerregaard sølviusumik Nersornaaserneqartoq
Inatsisartut Siulittaasoqarfiata Ilulissani Hotel Arcticimi Erik Bjerregaard sølviusumik Nersornaaserpaa najukkami inuiaqatigiit aallaavigalugit ukiorpassuarni inuussutissarsiummik ingerlataqarsimaneranut nersorinnissutitut.
Inatsisartut Siulittaasuata Lars-Emil Johansenip Erik Bjerregaardimut oqaaseqarnermini ilaatigut erseqqissarpai:
- Inatsisartut Siulittaasoqarfiata sølviusumik Nersornaaserpaatit ukiorpassuarni tunniusimallutit suliaqarsimanerit, pingaartumillu akunnittarfimmik immikkuullarilluinnartumik ingerlatsinerit, nunatsinni nunarsuullu sinnerani isigineqarnitsinnut assut kivitseqataasoq pissutigalugu. Ingerlatat akunnittaarfiinnaanngilaq.
- Akunnittarfeqarnermi neriniartarfeqarnermilu ilinniagaqarfigissallugu inuusuttut aamma orniginartitaraat , tamannalu illit aqutseriaatsit atorlugu angusinnaasimavat, allaallu sulisartut kattuffiannit SIK-mit nersorneqaatigalugu.
- Ukiut ingerlaneranni inuit pitsaasumillu sullissinissaq qitiutillugit akunnittarfiup pitsaassusia qaffakkiartortissimavat. Aammalu sullissineq pimoorussinerlu tamanna nunatsinnit tamarmit pingaartumillu nunanit allanit tikerartut tikikkuminartippaat. Akunnittarfimmik taama iluatsilluartigisumik ingerlatsiniaraanni pitsaasumik aqutseriaaseqarnissaq pisariaqarpoq, Inatsisartut siulittaasuat, Lars-Emil johansen, taama oqarpoq.
