Ullumikkut nunarsuaq tamakkerlugu ilitsoqqussaralugu oqaatsit ulloraat, tassungalu atatillugu Nuummi kulturip illuarsuani Katuami, nipilersortarfimmi malunnartitsisoqarnerani siullerpaamik pisumik oqaasiliortut nersorinninniutaannik tunniussisoqarpoq.
Nersornaaserneqartoq tassaavoq 57-inik ukiulik Erik Fleischer, Paamiuni Umiartornermut ilinniarfimmi inspektøriusoq.
Erik Fleischer-ip nersornaaserneqarneranut peqqutaavoq oqaatsitsinnik soqutigisaqarluinnarnera. Ukialerpat qarasaasiakkut kukkunersiuummik atorneqalersussamut suliniaqataarujussuarsimanera pissutigalugu aamma nersornaaserneqarpoq.
Erik Fleischer-ip oqaatsit 835.000-it kukkunersiuummut atugassatut katersorsimavai.
Oqaasiliortut siulittaasuat Carl Christian Olsen oqarpoq, Inuit oqaatsigut pillugit soqutiginnillutik suliniuteqarusuttut nersorniarusukkitik. Nersornaasigaasoq eqqumiitsuliamik aningaasanillu 5000 koruuninik akissarsitinneqarpoq.