Eriagisat allattorsimaffianit peersitsineq siulleq
Tysklandimi illoqarfik Dresden qoororlu kuup Elbenip eqqaaniittoq, kulturikkut kinguaariit kingornutassaattut eriagisat allattorsimaffiannit peersinneqarput. Allattorsimaffimmiit peersitsineq oqaluttuariisaanermi siullersaavoq tamannalu pingaarutilittut nalilerneqarpoq, tassami eriagisat mianersuutinngikkaanni annaaneqarsinnaanerannik takussutissiimmat.
juunip 29-at 2009 10:35
Kultuurikkut kinguaariit kingornutassaattut eriagisaqarnermi aqutsisoqarfiup pisortaata tullia Anne Mette Rahbækip aalajangiineq oqaluttuarisaanermi pingaaruteqarnerarpaa.
- Nunarsuarmi Kinguaariit kingornutassaattut eriagisat mianersuutinngikkaanni, annaaneqarsinnaanerannik takussutissiivoq, Anne Mette Rahbæk oqarpoq.
Elbip kuuata eriagisassatut allassimanera atorunnaarsillugu, Nunarsuarmi Kinguaariit kingornutassaattut eriagisaqarnermi ataatsimiititaliap aalajangiinera peqquteqarpoq, Dresdenip illoqarfiata angallaffiuallaarnerata kingunerisaanik, kuuk qulaallugu ikaartarferujussualiortoqarsimammat.
UNESCO-mi Nunarsuarmi Kinguaariit kingornutassaattut eriagisat allattorsimaffianniittut 878-ipput. Taakku ilagaat Ilulissat Kangia.
