Eriagisariallit pingaartittorujussuuaat

Taamammat Inuussutissarsiornermut aatsitassanullu naalakkersuisoq, Ove Karl Berthelsen, isumaqarpoq, Alcoap pilersaarutaata piviusunngornissaanut periarfissat suli 50 procentiinnaasut.

Soqutigisat imminnut aporaattut marluk Naalakkersuisut naapitinniartussaavat.

Tassalu Maniitsup eqqaani aluminiumik aatsitsiviliortoqarpat, tamatumunngalu atatillugu tatsit marluk innaallagissiornermut atorneqarpata, inuiaqatigiit aningaasaqarnerannut iluaqutissat. Aammali tatsip aappaata sinaani kulturikkut eriagisassanik peqarpoq, Nunatta Katersugaasivissuata Allagaateqarfiatalu iluatigisaanik.

Aamma pilersaarut ilumut piviusunngortinneqarpat eriagisassat taakkua arlaatigut aaqqiivigineqarnissaat pisariaqarpoq.

- Kulturikkut eriagisassat aammalu inuutissarsiornermut soqutigisat, taakku imminnut naapitinniarnissaat isumaqarpunga naalakkersuisuniit pingaartorujussuusoq, Inuussutissarsiornermut aatsitassanullu naalakkersuisoq Ove Karl Berthelsen oqarpoq.

Naalakkersuisut aamma apeqqutit allat akiniartusaavat. Tassalu aatsitsivik kinamiut atortuinik akikinnernik imaluunnit kitaamiut atortuinik akisunernik sananeqassanersoq. Aamma inuit qassit nunatsinnut suliartussanersut apeqqutaassaaq.

Tamakkua tamarmik akineqareerpata aatsaat Nunarput qanoq aningaasartortariaqassatiginersoq paasinarsissaaq.

- Uani eqqartorneqarpoq aatsitseriaaseq killiit ineriartortissimasaat aamma kinamiunit aatsitsinermut teknologi ukiuni kingullerni ineriartortissimasaat, taannalu maannakkut Alcoamit soqutigineqarneruvoq misissorneqarusullunilu. Taanna aamma naalakkersuisuniit pingaartinnerusimavarput akikinnerunera pissutigalugu. Sooq akikittuunerata aallaavia soqutigaarput paasissallugu, Ove Karl Berthelsen oqarpoq.

Aatsitsivissamik pilersaarut taamatut isikkoqartillugu akuerineqarsinnaanngitsoq, Nunatta Katersugaasiviata Atuagaateqarfiatalu nalilerpaa. Taamatut naliliinermut pissutigitinneqarpoq, Tasersiaq toqqarneqarsimammat erngup nukinga atorlugu innaallagissiorfittut atugassanngorlugu.

Nunatta Katersugaasiviata nalilersimavaa, tatsip Tasersiap eqqaa, oqaluttuarisaanitsinnut kulturikkullu eriagisassanik peqarnera pillugu Tasersiap innaallagissiorfissamut atorneqannginnissaa innersuussutigalugu.