Erfalasutta ataataa ataqqiniarlugu qiteqqunneqassaaq
Erfalasutsinnik ilusilersuinikoq Thue Christiansen Nuummi Hans Egedep oqaluffiani arfininngornermi, aggustip 13-iani ilisaassaaq.
Taannalu pillugu Namminersorlutik Oqartussaqarfik, suliffeqarfiillu taassuma ataaniittut tamarmik arfininngorpat erfalasortik qiteqqutissavaat.
- suliffeqarfiit sullissiviillu Namminersorlutik Oqartussat ataanniittut tamarmik toqukkut qimaguttumut ataqqinninnermik takutitsiniarlutik erfalasortik qiteqqutissagaat Naalakkersuisut aalajangersimapput.
Thue Christiansenip erfalasorput ilusilersugaraa, taannalu junip 21-ani 1985-ii siullerpaamik amuneqarpoq.
Erfalasutsinnik ilusilersuinikup ilisaareernerata, Nuummi kulturip illorsuani Katumi, kingorna tamanut ammasumik, nalunaaqutaq pingasuniit tallimat tungaanut kaffillertoqassaaq.
Thue Christiansenip kalaallit erfalasuat – erfalasorput – titartarnikuuaa. Erfalasup ilisarnaatigaa seqerngup aasarisseruttornerani sermikkut nuiartornerata qaamarnga kissalaarneralu.
Pappiliaq qeratasooq, qiuutit, liimmerlu
Thue Christiansen ilinniartitsisutut ilinniarsimavoq eqqumiitsuliullaqqissuusimallunilu. Siumumi ilaasortaasimavoq ilaatigullu Inatsisartuni ilaasortaasimalluni aammalu Folketingimilu sivikitsumik ilaasortaasimalluni.
AAMMA ATUARUK Erfalasutta ataataa toqukkut qimaguppoq
Thue Christiansen inuttut suliaasalu nunatsinnut isumaat pillugu Lars Emil Johansen ima oqarpoq:
- Ilinniartitaanermut naalakkersuisoq siullerpaaq. Taanna sioqqullugu kalaallinit oqartussaaffigineqarsimanngitsoq, naalakkersuinikkut Thuep aamma akisussaaffigaa.
- Tassanilu pingaartittorujussuuai inuiaqatigiit kalaallit meerartaat aamma inuiaqatigiit kalaallit atugaannut tunngasunik ilinniartinneqassasut. Taamaattumik aamma oqarsinnaavunga eqqumiitsuliortutut politikeritullu piginnaanini ataatsimoortillugit erfalasuliorami atorpai.
Danmarkimi toqukkut qimaguppoq
Erfalasutsinnik ilusilersuisoq Thue Christiansen, sivisuumik napparsimareerluni Danmarkimi juunip 26-ani toqukkut qimaguppoq.
Taanna 82-inik ukioqarluni qimaguppoq.
