Erfalasup oqaluttuassartaa paasineqartoq

Erfalasoq allagaateqarfiup katersugaataani 1930-mili katersugaatiniilersimavoq, erfalasorlu Knud Rasmussenip ilisimasassarsiorluni Thuleminngaanniit tallimassaa angalaneraneersuusoq, allagaateqarfiup paasisimavaa.

Erfalasup suminngaanneersuunera siornatigut ilisimaneqarsimanngikkaluarpoq. Allagaqaateqarfimmili katersugaatit digitalinngortinneqalermata, Knud Rasmussenip qanga allassimasaa siumorneqarsimavoq.

Erfalasup Stars and Stripesip 46-innarnik ulloriallip qanoq ililluni katersugaatinut ilanngunneqarsimanersoq Knud Rasmussenip allakkamini nassuiaateqarfigaa. Aviisi Nordjyske Tidende taama allaaserisaqarpoq.

Erfalasup Alaskami Point Hope-imi katerisimaarnerup nalaani tunniunneqarsimanera, Knud Rasmussenip allakkamini allaaseraa.
Allagaq amerikamiumut Danmarkimit kingoqqisumut Max Heniusimut allanneqarsimavoq. Max Henius Rebildselskabimik pilersitsisuuvoq.

Ilisimasassarsiorluni angalanerup nalaani erfalasoq taanna qallunaat erfalasuallu ingiaqatigiittuarsimasut, Knud Rasmussenip allaaseraa. Qallunaat erfalasuat kunngip Christian Qulingata tunissutigisimavaa.

- Rebildimi 1930-p aasaanerani naapeqatigiinnermi peqataareerlunga paasivara, erfalasoq oqaluttuarisaanikkut uannut pingaaruteqartoq ataasiinnarmi inissisimaffissaqartoq, tassalu ilinni, ikinngutiinnermik aallartitsiffiusaqisumi, Amerikap Danmarkillu akornanni qilerutinik pilersitsiffiusunik, Knud Rasmussen allappoq.

Danmarkip allanut nunasiartorsimasut pillugit allagaqaateqarfia Aalborgimi ullumi inissisimavoq, erfalasorlu tassani takuniarneqarsinnaalluni.