Erfalasorput sammineqaqqilerpoq
Kalaallit erfalasorput danskit tusagassiorfiinit ullaaq manna sammineqangaatsiarpoq – erfalasorput ukiut
20-t sinnerlugit pioreeraluartoq - taamanili apeqqutigineqartarsimasoq Atuagagdliutini atuartartut ilaata allagaa pissutigalugu kingumut sammineqaqqilerpoq – tassa: Kalaallit Nunaata erfalasua iporsuuttartut ilaasa erfalasuaraata assigaa?
Erfalasorput 1985-mi atulerpoq – eqqumiitsuliortoq – Naalakkersuisunullu ilaasortaasimasoq – Thue Christiansen – suliarinnittuulluni.
Danmarkimili Århusip eqqaani illoqarfimmi Egå-mi erfalasuaraq erfalasutsitut ilisarnaatilik, qalipaateqaterluinnaalu, 1969-mili atorneqalerpoq.
Thue Christiansenip Kalaallit Nunaannut erfalasortaarititaa 1985-mi atulermat oqallittoqaqaaq – namminerli suliaanersoq, issuaalluniluunniit pinngorsimanersoq, pillugu oqallinneq naammassinngilaq, oqallisaasumullu ilaagujoq, angutit marluk ukiunik 16-nik akunniliinnarlugu, assigiimmik isumassarsisimanersut.
Kalaallit Nunatsinni pisut Danmarkimi soqutigineqarluartarput, erfalasorpullu ilumut nammineq isumassarsiaanersoq, assilisaanersorluunniit, aviisip Politikenip nittartagaani ullaaq maanna atuarneqarnerpaanut ilaagunarpoq.
