Erfalasoq tammaraluartoq uterteqqilerpaat

Erfalasoq oqaluttuarisaanermi pingaaruteqarluinnartoq Nunavummut utertinneqaqqilerpoq.

Erfalasoq taanna, Inatsisartut ataatsimeeqqaarmata, erfalluaqisoq, tammaaneqarsimagaluarpoq. Nutaarsiassaqartitsivik CBC taama nalunaarpoq.

Inatsisartut Iqalunni ilinniarnertuunngorniat atuarfianni ataatsimeereermata, erfalasoq eqqaavimmut piumassuserinngisamik iginneqarsimavoq.

Qaammatit arlalialuit qaangiummata ilinniartitsisut ilaannit nassaarineqarpoq, kujasinnerusumulli aallarami nassarsimavaa.

Ilinniartitsisoq erfalasumik nassaartoq Paggivittammi Saint Johnimi maanna niuertarfiuteqarpoq, inuit eqqumiitsuliaannik ilaatigut nioqquteqarluni. Erfalasorlu pineqartoq iikkami pinnersaatitut nivingavoq.

Tamanna sapaatip akunnerani kingullermi malugineqarpoq. Ilinniartitsisup erfalasoq Nunavummut nassiuteqqinniarpaa, isumaqarsimavormi ilumut iginneqarsimasoq. Erfalasup pingaaruteqaqisup inissavimminut pinissaa ilinniartitsisup neriuutigaa – tassa Inatsisartut ataatsimiittarfiannut.