Eqqussisut inuiaqatigiinnut kiffartuussissapput

Ilulissani angutit pingasut 26-nik ukiullit ikiaroornartumik hashimik aamma dopinginik nukassaatinik eqqussisimasutut Ilulissani eqqartuussivimmi decembarimi ukiumi ataatsimi arlaallu qaammatinilu 14-ini pinerluuteqarsimasut inissinneqartarfianniittussanngorlugit pineqaatissinneqartut, Nunatta eqqartuussivianit allatut pineqaatissinneqarput.
Allattoq Oline I. Olsen
februaarip 23-at 2012 08:57

Angutit pingasut inuiaqatigiinnut akunnerni 240-ni kiffartuussisussanngortinneqarput ukiunilu marlunni nakkutigineqartussanngorlutik. Unnerluussisuuneq Helle Olesenip Eqqartuussinermi takussutissiaq suli takunngikkaluarlugu tupaallappoq, imalu qisuariarluni.

-Inuiaqatigiinnut kiffartuussisussanngortinneqarneri tusaatissatut tiguinnartariaqassavarput. Taamatulli pineqaatissiineq uagut piumasaatigisatsinnut naapertuutinngilaq. Unnerluussisutut piumasarisimagaluarparput pinerluuteqarsimasut inissinneqartarfianniisinneqartussanngorlugit pineqaatissinneqassasut.

- Unnerluussisutullu isumaqarpugut, ikiaroornartumik eqqussuinermut tunngatillugu, soorlu kiilunik arlalinnik eqqussuisimanermik pinerluuteqartut, pineqaatissinneqarsimasut inissinneqartarfianniittussanngorlugit kinguneqartinneqartassasoq, inuiaqatigiinnimi ikiaroornartumik eqqussuinerup pinaveersaartinneqarnissaa soqutigisarineqarpoq, Helle Olesen oqarpoq.

- Uanilu suliamut tunngatillugu isumaqanngilagut allatut suleriaaseqartoqalersoq, isumaqarpugulli suliami matumani Nunatta eqqartuussiviani immikkut nalilersuisoqarsimasoq, unnerluussisuuneq Helle Olesen oqarpoq, erseqqissaallunilu Nunatta eqqartuussiviani suliamut tunngatillugu takussutissiamik suli takusimanani, pineqaatissiinermilu tunngavilersuutit nalilersuinerillu suli takusimanagit.

Nunatta eqqartuussisuunera Søren Søndergaard Hansenip suliap inernera pillugu sapaatip akunnerata tulliani aatsaat oqaaseqarusuppoq, tassani eqqartuussinermi takussutissiaq naammassineqareersimassammat.