Rappertartoq Josef Tarrak illoqarfinni assigiinngitsuni tusarnaartitsisussaagaluarpoq, coronavirusilli ajornartoortitsinera pissutaalluni tamanna taamaatiinnarneqarluni.Assi: KNR

Eqqumiitsuliortut legatinut qinnuteqarsinnaasut

Kultureqarnermut naalakkersuisoq eqqumiitsuliortorpassuarnut coronap ajornartooqqatitsinerani ikiorsiissuteqarniarpoq.

Tusarnaartitsinissat, saqqummersitsinissat takutitsinissallu taamaatiinnarneqartut kinguartinneqartullu. 

Tamakku nipilersortartut, isiginnaartitsisartut eqqumiitsuliortullu allat coronap ajornartorsiortitsinerani nalaappaat. Taamaatitsiinnartoqarnerata nassatarisaanik aningaasanik annaasaqartoqarpoq - suliffeqanngikkaannimi - akissarsiassaqanngilaq.

Eqqumiitsuliortut kulturikkut sulialinnut aningaasaliissutinut qinnuteqarsinnaanera piffissami aalajangersimasumi kisimi atuukkaluartoq kultureqarnermut naalakkersuisup, Ane Lone Baggerip ingerlaavartumik qinnuteqarfiusinnaanngortippaa.

AAMMA ATUARUK Nipilersortartoq coronap ajornartorsiortitsinerani: 100.000 koruunit sinnerlugit annaavakka

Qinnuteqarnissamut piffissaritinneqartut nalinginnaasut maanna atorunnaarsinneqarput, taamaalillutik eqqumiitsuliortut suliaqarnissamut nutaanik isumassarsigunik ullumikkumit qinnuteqarsinnaalerput. 

Suliaqarnissamulli piumasaqaataasut malittarisassallu nalinginnaasut suli atuupput.

Paasissutissat qinnuteqarfissarlu www.sullissivik.gl-imi nassaarineqarsinnaapput.

Isummersuutit