Eqqumiitsuliortut ataatsimut kattuffittaassapput
Kulturikkkut suliaqartut assigiinngitsut suleqatigiiffigisinnaasaminnik kattuffimmik pilersitsipput, taaguutilimmik Eqqumiitsuliornikkut Pinngorartitsisut Ingerlatsisullu Suliniaqatigiiffiisa Kattuffiat.
Allattoq Jaaku Lyberth
Ataatsimoorfigisinnaasamik ujartuineq kulturi pillugu isumasioqatigiinnermi ukioq 2008-imi decemberip qaammataani saqqummiunneqarpoq, maannakkullu tamanna piviusunngussaaq.
Eqqumiitsuliortut kattuffittaavat, EPISK, sapaammi majip ulluisa 16-anni pilersinneqassaaq.
Eqqumiitsuliortut kulturikkullu suliaqartut
kattuffik aqqutigalugu atukkatik pillugit pisortanut ataatsimut oqariartuuteqarsinnaalissapput aamma nunani allani soqutigisatik pillugit isumagineqarsinnaalerlutik.
EPISK-ip pisortat aningaasaliissutaannik isumaginnittunngorsinnaanissani anguniassavaa.