Eqqumiitsuliortut arnat tapiiffigineqartarnerat annikinneruvoq
Ullumikkut Arnat Ulluata pinissaa ullunik marlunnik sioqqullugu paasinarsivoq eqqumiitsuliornerup silarsuaani naligiissitaanissaq suli ungaseqisoq.
Danmarkimi eqqumiitsuliortut arnat angutinut eqqumiitsuliortunut sanilliullugit aningaasaateqarfinniit tapiiffiginikinnerusarput aamma akissarsiakinnerupput.
Danmarkimi kunstrådip nalunaarusiamini nutaami oqaatigaa eqqumiitsuliortut arnat angutinut naleqqiullugit atugarissaannginneroqisut.
- Allaat eqqumiitsuliortut ilisimaneqartut taamaallaat cykeleqartarput Nørrebro-milu ataasiinnarmik initalimmi najugaqartarlutik. Taama oqarpoq nalunaarusiamik allattut ilaat inooqatigiit pissusiinik ilisimatusarsimasoq Karen Schierup, Roskilde Universitetscenterimi naligiissitaaneq pillugu ilisimatusarfimmeersoq.
- Isiginnaartitsisartut akissarsiaat qiviaraanni, aamma qaffasinnerpaat akornanni arnat angutinit aningaasarsiakinneroqisut takuneqarsinnaavoq aamma arnat angutinut sanilliullugit aningaasaateqarfinniit tapiiffiginikinnerusarput, Karen Schierup oqarpoq.
Kunstrådip nalunaarusiaani arnat 23-t apersoqqissaarneqarnerat tunngavigineqarpoq. Taakkua tassaallutik isiginnaartitsisartut ilisimaneqartut, operamik erinarsortartoq, nipilersortartoq, assilialiortoq, isiginnaartitsissusiortartoq atuakkiortorlu. Ilaatigut oqaatigineqarpoq arnat eqqumiitsuliortut nammineq suliaminnik tuniniaallaqqissuunngitsut, aamma akissarsiat isumaqatigiinniutigineqaraangata, taama oqarpoq isiginnaartitsisartoq Anne-Grethe Bjarup Riis.
- Nammineq suliaminnik tuniniaanerluttuupput isumaqatigiinniarnernilu sanngiittaqaat. Tamatumunnga patsisaavoq arnat misigissutsitik ilanngussuuttarmatigik kikkullu tamarmik pitsaasumik atugaqarnissaat eqqarsaatigivallaartarlugu tamannalu eqqumiitsuliortut arnat sanngeeqqutigisarpaat, Anne-Grethe Bjarup Riis oqarpoq.
