Eqqumiitsuliortorpassuit saqqummersitsipput

Eqqumiitsuliortut nunatsinniit Norgemiit Danmarkimiit, Islandimiit nunatsinneersullu katillugit 30-t missaanniittut ulluni pingasuni Nuummi Inussivimmi saqqummersitsipput. Saqqummersinneqartut assigiinngitsorpassuupput ilaatigut assilissat, nerisassat, qiperukkat, ivikkanik ikaartitikkat, umimmaat qiviunik suliat allarpassuillu. Tamatuminnga aaqqissuisoq eqqumiitsuliortoq Thue Christiansen oqarpoq eqqumiitsuliortut kisimiillutik sulisarmata pisariaqartoq naapeqatigiittarnissaat, taamaalilluni imminnut isumassarsioqatigiittoqarsinnaammat. Taanna aperaarput, nunatsinni eqqumiitsulianik tuniniaajutigaluni saqqummersitsinissaq sooq pingaartuunersoq.

- Nunatsinni pingaartorujussuuvoq taamatut ataatsimoorsinnaaneq illoqarfiit nunaqarfiillu imminnut siammasissorujussuupput taamattumik eqqumiitsuliortut naapissinnaasariaqarput, tassami amerlanerit angerlarsimaffimminni taannarpiaannangajavik suliarisaramikku. Pisariaqartittarpaat allat tamakkulerisut naapinnissaat tamannarpiarlu siunertaavoq massuma saqqummersitsinerup pilersinneqarneranut, Thue Christiansen oqarpoq.

Taanna aperaarput nutaanik isumassarsianik nassaartoqarnissaa pingaartinneqartartoq sooq taamaannersoq apeqqutigaarput.

- Uniinnassanngilagut aamma siuariartussaagut ingerlaqqissaagut, tassami tupilaliuinnaraluarutta pissanganarunnaassaaq. Taamaattumik nutaat nutaaliat nunattalu pissarititaat assigiinngitsut piorsaavigineqartariaqarput, oqarpoq.

Taassuma pingaarnerit ilaattut tikkuarpai umimmaat qiviuisa sanaartorneqarnerat kiisalu nunatsinni marraap nunattalu kuultiata ineriartortinneqarnissaat.

Thue Christiansenip aamma erseqqissaatigaa kigutilissuup kigutai avammut anniseqqusaannginnerat tamatumalu sillimaffigineqartariaqarnera oqaatigaa.

- Qanga saanernik sananeqartaraluartut pikkorissaanermi uani sølvinngortinneqarnissaat pingaartinneqarput, taama oqarpoq, eqqumiitsulianik tuniniaajutigaluni saqqummersitsinermi aaqqissuisoq Thue Christiansen, saarngit nunatsinniit anniseqqusaanngitsut ilaatigut tassaapput kigutilissuup, arfiviup, tikaagulliusaallu saarngi kiisalu nattorallip saarngi. Thue Christiansen oqarpoq saqqummersitsineq nunatta karsianiit 150.000 koruuninik tapiiffigineqartoq.