Georg 'Kiiu' Olsenimut nersornaasiinermi tunngavilersuutigineqarpoq, nersornaaserneqartup inuusuttoqaterpassuarminut takutimmagu piumagaanni angusassarpassuaqartoq.
Georg 'Kiiu' Olsen, Qeqertarsuarmi inunngortuusoq, Nuummi Vejlemilu eqqumiitsuliornermik ilinniarfinni aamma ilinniarsimasuuvoq, saqqummersitsinerpassuarnut peqataasarsimalluni, aamma innuttaasut illui katersortarfiillu arlariit iigaasigut qalipagarsuarnik pinnersartarlugit. Taakkua saniatigut Qaqortumi illoqarfimmi kusassaalluni ujaqqanik aamma qiperueqataasimavoq. Aamma taalliortuuvoq atuakkiortuullunilu.
Atuagaq 'Isit matoqqasut' ilaatigut saqqummersissimavaa.
Taakkua saniatigut nipilersortartutut ilisarisimaneqarluarpoq. Nipilersoqatigiit aallartititai, Liima Inui, Kodap nersornaasiuttagaanik aamma KNR Award-imik ilaatigut nersornaaseqarneqarnikuupput, CD-liaminnut 2007-imi saqqummersumut 'Pluto'-mut.