Eqqumiitsuliortoq Perumi angalatilluni toqusoq
Nunarput Rama King Nashimut qularnanngitsumik pingaaruteqangaatsiarsimasoq, Kimik-mi siulittaasuusimasoq oqarpoq.
Rama King Nash nunatsinni 2013-imit 2015-imut najugaqarnermini Kimik-mi ilaalerpoq, Lisbeth Karline Poulsenilu naapertorlugu nunatsinnit isumassarsingaatsiartarsimavoq.
- Ilimagivara Kalaallit Nunaata qalipaatigissaarnerata avataatigut oqaluttuatoqqat alutorilluarai. Ataatsimoortumik sammisaqarnikuuvugut upperisapalaanik qulequtserlugu, tamanna kalaallit mexicomiullu eqqumiitsuliortut suleqatigiinneraat, Rama King Nashimi isumaqarpoq upperisapalaajutigut mexicomiut upperisapalaavilu imminnut assingusorujussuusut.
AAMMA ATUARUK Kimik forstår ikke udflytning af kunstskole til Aasiaat
Inersimasunngorami Danmarkimut nuuppoq
Rama King Nash Mexicomi inunngorpoq inuunerminilu ukiut siulliit amerlasuut Mexicomiilluni aatsaat 20-nik ukioqalereerluni Danmarkimut anaanami suminngaanneerfianut nuuppoq.
Rama King Naship 42-nik ukioqarluni Perumut angalanermini toqukkut qimagussimanera pillugu Lisbeth Karline Poulsen ataasinngormat nalunaarfigineqarpoq.
- Siusippallaarujussuarpoq. Eqqumiitsuliortut peqatigiiffianni aappaagu saqqummersitsinissatsinnut saqqummersitassaminik pilersaaruteqalereeraluarpoq. Kalaallit eqqumiitsuliaata siammarternissaanut eqinnaatsorujussuuvoq, pikkorissorujussuusoraatigummi eqqumiitsuliagullu ajunngilluartut nunarsuarmut siammarneqartariaqarsorai, Lisbeth Karline Poulsen oqarpoq.
Kalaallit eqqumiitsuliaannik nittarsaassisoq
Nunatsinnit isummertarnerata saniatigut kalaallit eqqumiitsuliaannut tunngatillugu nunarsuatsinni aamma ambassadøriuvoq.
- Ilaasortamik annaasaqarnitta saniatigut, saqqummersitanik angallassinermi siuttuusumik annaasaqarpugut, nukissarpassuimmi atortarpai pikkoriffigingaatsiarlugillu, eqqumiitsuliortut peqatigiiffianni Kimik-mi siulittaasuusimasoq, Lisbeth Karline Poulsen oqarpoq.
Rama King Nash nunarsuarmi eqqumiitsuliortartunit tusaamaneqarluartup, oqqassaarisartullu Jørgen Naship ernutaraa.
