Eqqumiitsuliortoq Jessie Kleemann atuakkami nutaami nersorniarneqarpoq

Eqqumiitsuliortoq kalaaleq Jessie Kleemann Nunatsinni eqqumiitsuliornermi oqaluttuarisaanerani eqqumiitsuliortuni sumiginnagaanerpaanut ilaavoq. Taama atuakkiortoq eqqumiitsulianillu naliliisartoq Iben Mondrup oqaaseqarpoq, taassuma Jessie Kleemann pillugu atuakkiani ullumi saqqummersissavaa.
Allattoq Martine Lind Krebs, Knud Reimer
juunip 20-at 2012 09:24

- Jessie Kleemann eqqumiitsuliortut Kalaallit Nunaanneersut malunnaateqarnerpaat ilaattut isigaara, taassumami Kalaallit Nunaat nunarsuullu sinnera suliffigisarpaa. Aamma sivisuumik naammassisaqarfiulluartumillu suliaqartareerpoq, naammassisimasarpassuilu iluamik nalunaarsorneqarsimanatik, Iben Mondrup taama oqarpoq.

Jessie Kleemann saqqummersitsigaangami isiginnaagassiortarnini tusaamasaassutigaa, taamaammallu eqqumiitsuliai nassuiassallugit piuminaatsuullutik. Eqqumiitsuliortorli taanna Iben Mondrupip atuakkiamini "Qivittoq"-mi ilisaritinniarsimavaa.

- Eqqumiitsuliani saqqummersikkaangamigit takusassiortarnera uanga oqaluttuariinnarnagu inuit Jessiep eqqumiitsuliaanik takunnissimasut nassuiaatissimavakka. Tassami Jessie taamatut takusassioraangami isummersorfigisariaqartuaannartarmat. Tassa imaassinnaavoq iliuusai nuannarineqartut imaluunniit aalassaassutigineqartut. Isiginnaagassialiortarnerit atuakkiami ilaarniarneqanngillat, Jessie-lliuku isiginnaagassiisarneri atuakkiami ilisaritinniarneqartut, Iben Mondrup oqarpoq.

- Jessie Kleemann eqqumiitsuliaminik isiginnaagassioraangami Metamorfose-rtarneq - imaluunniit allanngoriartortarneq atugarisarpaa. Ilami akoorissalluni qunuginnginnamiuk ilaatigut annoraamineq saattoq naaminut immussuuttarpaa, puisillu orsuanik annoraaminermut manngussuisarluni. Tassa iliuuseqaraangami eqqumiiffaarissumik akoorisarpoq, sunarpiaanersorlu takutinniarneraa oqaatigiuminaattarluni. Iben Mondrup taama oqarpoq.

Iben Mondrup-ip atuakkiaani Ivalo Frank, Mette Moestrup, Randi Broberg, Niels Lyngsø, Brian Catling aamma Åsne Linnestå ilanngutassiipput.

Atuakkiaq Jessie Kleemann - Qivittoq kalaallisut tuluttullu oqaasertalersugaq 95-nngorlugu Nunatsinni atuakkanik atorniartarfinnut nassiussuunneqareerpoq. Namminerli pisiariniaraanni juunip 25-ianiit atuagaarniarfinni pissarsiarineqarsinnaanngussalluni.

Iben Mondrup, Jessie Kleemann-ilu aamma videoliorsimapput, taannalu Islandimi saqqummersitsinermi Horisonic-imi massakkorpiaq takuniarneqarsinnaavoq. Aamma Jessie Kleemannip eqqumiitsuliorluni isiginnaagassiaa Sassuma Arnaa nittartakkami horisonic.net-imi isiginnaarneqarsinnaavoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk