Eqqumiitsuliat alutornartut Taseralimmi saqqummersinneqarput
Sisimiormiu Inuuteq Storch assiliinermik ilinniarfimmi Københavnimiittumi tusaamasaaqisumi Fatamorganami ukioq ataaseq ilinniartuussalluni siorna aallartippoq.
Taassuma assiliinermik soqutigisaqarnera atuartuugallarneranili paasinarsivoq. Inuuteq Storch 2009-mi Taseralimmi saqqummersitseqqaarpoq, tamatumani pikkorissutsiminik takutitsiinnarani, aammali assilissap oqimaaqatigiinneranik kusanassusermillu takunnissinnaanermik ersersitsisarluni.
Saqqummersitani nutaani Inuutip Fatamorganami ilinniartuusimanera malugineqarsinnaasoq, aamma assiliineq atorlugu eqqumiitsuliai isiginneriaasialu sakkortunerulersimasut, Taseralimmit maluginiarneqarput.
Assinik isiginnaareernermi unnukkut rockimik nipilersortunik tusarnaartoqarsinnaavoq, taakku tassaallutik nipilersoqatigiit Small Time Giants, Århusimi najugaqaraluarlutik Qaqortormiuusut.
Tivolimi ukiormanna Nunatsinnik ulloqartitsinernut atatillugu nipilersoqatigiit nuannarineqaqalutik tusarnaartitsipput, maannalu nipilersoriaasiat allaalaartoq kalaallinit tusarnaarneqarsinnaassalluni. Nipilersoqatigiit Nunatsinni siullerpaamik tusarnaartitsissapput sapaatillu akunnerata tulliani Nuummut tusarnaartitsiartussallutik.