Eqqumiitsuliaq sumut pisimagaluarnerpoq

Ilulissap saatsersup qaaniittoq eqqumiitsuliaq Cool Emotion imaani sumiiffeerunneqarpoq. Taamaakkaluartoq sumiissusersiut qaammataasamut suli nassitsiuarpoq, takuneqarsinnaallunilu Uummannap eqqaani Saattuniittoq.
Allattoq Najaaraq Egede
juunip 03-at 2010 13:08

Ap Verheggenip eqqumiitsuliaa nunarsuarmit tamarmit nittartakkakkut sumiinneranik malinnaavigineqarsinnaasoq Cool Emotion imaanut kivisimagunarpoq.

Ilulissap qaani eqqumiitsuliaq marsimi saatsersussanngorlugu avalatsitaq, saviminernit amitsukujuunit qimussersutut ilusilersugaavoq.

Sumiissusersiutillu GPS-it timitaanut ikkunneqarsimapput.

Eqqumiitsuali uaniippoq. Eqqumiitsuliortup nittartagaani eqqumiitsuliat sarfap aallarummagilli, sumut killinneri malinnaavigineqartuarsinnaasut, ippassaq eqqumiitsumik ingerlaviat allanngoriataartoq takuneqarpoq.

GPS-ip takutippaa eqqumiitsuliat imaannarmi kujammut sarfamit ingerlanneqarusaarunnaarlutik, tassanngaannaq avannamut saariataarmata, nunaqarfiup Saattut tungaanut ingerlaalerlutik.

Ap Verheggen isumaqarpoq, qaammataasakkut sumiissusersiut GPS-i - eqqumiitsuliaq ilulissap qaaniittoq kiveriarmat aalisartumit nassaaralugu tiguneqarluni Saattunut angerlaanneqarsimasoq.

Eqqumiitsuliortup ikinngutaasa eqqumiitsuliaq iluliarlu ujarsimagaluarpaat, iluatsitsinatilli. GPS-i kia tigusimaneraa nalunarluinnarpoq, naluneqanngitsorlu tassaavoq GPS-ip nassitsissutaata Saattuniinnerarmagu.