Eqqumiitsulianik suliaqartut ilisimatuussutsikkut missisuiffigineqarput
Taanna Københavnip universitet-iani Eskimologi mi sulinerminut atatillugu ilisimatuussutsikkut misissuinermini kalaallit eqqumiitsuliortuisa nutaaliaanerusunik suliaqartut sulinerminni kinaassusertik pingaartikkaat paasisimavaa. Kalaallit qangaaniilli kulturikkut atugaannit aallaveqarpoq taamatullu avammut kiinnernermut sammilluni.
Kalalallit eqqumiitsuliortuisa inuiaqatigiinnit qanoq isumalluarfigineqartiginerat Jørgen Tronhjemip soqutigisaasa ilagaat.
Kalaallit eqqumiitsuliortuisa kinaassutsip nittarsaanneqarnissaannut oqaasertalernissaannullu ilungersuuteqartarput, Jørgen Tronhjem isumaqarpoq. Ilaqarput eqqumiitsuliortuunertik kisiat eqqarsaatigigaat, kalaaliunertik pingaartinnerunagu. Imatullu paasineqartariaqanngilaq kalaaliunertik ajorigaat, eqqumiitsuliortutulli suliatik saqqummersikkusuttarpaat. Eqqumiitsuliortut eqqumiitsuliaminnik suliaqartillugit kalaalerpaluttunik suliaqarnissaat naatsersuutigineqartarpoq, soorlu Namminersornerullutik Oqartussat sanaanneqaraangata taava kalaalerpaluttunik suliaqarnissaat naatsersuutigineqartarluni. Nunat tamat akornanni eqqumiitsulianik saqqummersitsisoqassatillugu tuniniaasoqarneraniluunniit, eqqumiitsulianik pissanganartunik suliaqarnissaat naatsersuutigineqartarput, kinaassuseq suminngaaniillu aallaaveqarneq pisariaqartinneqarpiarani, Jørgen Trondhjem suleqatitsinnit Kristian Bjørn Hansenimit oqaloqatigineqarluni oqarpoq.
Eqqumiitsuliortup siorna toqusup Pia Arkep eqqaanikuuvaa eqqumiitsuliortutut sulinermi marloqiusamik inissisimalersinnaaneq. Eqqumiitsulianik suliat nunagisami nunarsuullu sinnerani atorneqarsinnaasut qanoq ilillugit pilersinneqarsinnaanerat apeqquserlugu.
Jørgen Trondhjemip eqqummiitsuliortoq Inuk Silik Høegh assersuutitut eqqaavaa. Taassumap eqqumiitsuliani nalinginnaasumik kalaallit eqqumiitsulioriaasiat nunarsuullu sinnerani eqqumiitsulioriaatsit nutaajunerusut ilannguttarpai.
Kinaassuseq nassaariniarlugu qanga pisimasunut uterluni ujaasineq soqutigisarisimavara, soorlu Kalaallit Nunaanni oqallinnerni tamanna ilisarnaataasoq, tassalu qanga pisimasunut uterluni kinaassutsimik kulturimillu ujaasisarneq. Eqqumiitsuliortut ilaannut iluaqutaasarsimassaaq, taamaattorli qanga pisimasunit inissisimanermit ingerlariaqqinngitsoortoqarsinnaavoq. Siuaasatsinnit qangalu pisimasunit pissarsiavut atortariaqarigut uanga isumaqarpunga, nutaanilli ilallugit immertariaqarpagut eqqumiitsuliortoq Inuk Silik Høegh suleqatigitsinnit Kristian Bjørn Hansen oqaloqatigineqarluni oqarpoq.
