Eqqumiitsulianik saqqummersitsineq

Sapaatip akunnerata ataatsip qaangiunnerani eqqumiitsuliortut nuiamanerit ukiaanerani Charlottenborg-mi København-miittumi eqqumiitsuliortoq Kalaaleq Julie Edel Hardenberg, saqqummersitsinissaanut ilaatinneqassaaq. Eqqumiitsuliortut immikkut qaaqqusat saqqummersitsinermi peqataassapput, Juliallu qaaqquneqarsimanini nuannaarutigaa:

- Kalaaliunerinnaq pissutaatinneqanngilaq, eqqumiitsulianilli takutitsisinnaaneq saqqummersitsinermut qaaqqusaaninnut pissutaalluni, tamannalu nuannaarutigeqaara, Julie Edel Hardenberg, Inge S Rasmussen-mit apersorneqarluni taama oqarpoq. Oktoberip aallaqqaataaniit Julie Edel Hardenbergip assiliivik atorlugu katersai qulequtaqartoq, ”Uanga qatanngutikkalu”, saqqummiutissavai, saqqummersitsisunilu tamani qulequtarineqarpoq kinaassuseq kultoorikkullu assigiinngissuteqarneq.

Charlottenborgimi Københavnimiittumi oktoberip aallaqqaataaniit 23-anut saqqummersitsisoqarera takuniarneqarsinnaassaaq.