Eqquisoq suli tusarfigineqanngilaq
Arfininngormat lottomi makitsinermi Paamiormiu 10 millionit koruuninnattoq Danske Spilimit suli tusarfigineqanngilaq.
Allattoq Apollo Jeremiassen
maajip 25-at 2010 10:50
Danske Spilimi tusagassiutinut nalunaartartoq, Karen Minke, Radioaviisimut oqarpoq millionærimit tusagaqarnissani erinigalugu.
- Eqquisut ilasa eqquinertik isertuukkusuttarpaat, taamaattumik pisiniarfimmut allamut allagartaq eqquissutertik takutikkiartortarpaat. Paamiuni pisiniarfik ataasiinnaavoq, taamaattumik eqquisup allamukarnissaa qularnarpoq. Maani Danske Spilimi piareersimavugut millionærinngortoq siunnersussallugu, Karen Minke oqarpoq.
Eqquisut siunnersornissaannut Danske Spil piareersimajuarpoq, aamma Paamiuni eqquisoq siunnersussallugu.
- Paamiuni eqquisoq kalaallisuinnaq oqaluttuuppat, maani piarereersimavugut kalaallimik ikiorteqarnissatsinnut, Karen Minke, oqarpoq.
