Eqqortumik saqqummiussisaqquai

-Silap pissusaata allanngoriartornerani ilisimatusarnerit inerneri ilumoortutut allanngortitassaanngitsutut saqqummiukunnaarniarsigik, taama mianersoqqusivoq Nobelip nersornaasiuttagaanik nersornaasigaasimasoq, Steve Chu, Berkeley Universitetimeersoq.

Sapaatip akunnerani qaangiuttumi ataatsimeersuartoqarnerani Steve Chu-p mianersoqqusinera tutsiuppoq, uparuaanerminilu tikkuagai tassaapput ilisimatuut nunanit tamaneersut, Chu-mi isumaqarpoq avatangiisit silallu pissusaa pillugu apeqqutit tamanut saqqummiunneqassagaangata ilisimatuut ingasattajaarlutik ersisaaralutillu saqqummiussisartut. Steve Chu-p fysikimik ilisimasaqarluarnini pillugu Nobelip nersornaasiuttagaanik 1997-imi nersornaaserneqartup, ilisimatooqatini isornartorsiorpai oqarluni, ilisimatusarnerminni inernernik saqqummiussileraangamik ajornerpaaginnarnik saqqummiussisartut, tamatumalu kingunerisaraa paatsuunganeq uivernerlu.

-Misissuinerit inerneri ammasumik eqqortumillu saqqummiuttarniarsigik, avammullu saqqummiussigaangassi oqartarniaritsi, saqqummiussassi annikinnersaat tamakkiisumik qularnaatsuusarmata.

-Kalaallit Nunaanni sermeq 50 procentimik aakkiartornersoq, imaluunniit 100 procentimik aakkiartornersoq, assigiinngissutilerujussuuvoq, Steve Chu oqarpoq, silalli kissatsikkiartornerata kingunerisai taassuma qasaginngilai, ilisimatuulli kajumissaaginnarpai sila pillugu oqalittoqaraangat imminnut upperivallaartarunnaaqqullugit.