Assi: KNR

Misissuineq: Eqqorneqaratarsinnaasut inissisimanertik namminneq pisuussutigigaat

Suliffeqanngitsut atornerluisullu inissisimaffitsik namminneq pisuussutigaat. Kalaallit Røde Korsiata innuttaasut eqqorneqaratarsinnaasunut tunngatillugu inuiaqatigiit isumaannik apersuinikkut taama inerniliipput.

Inuit aalajangersimanngitsumik toqqakkat 970-it oqaaseq eqqorneqaratarsinnaasut pillugu apersorneqarput, apersorneqartullu affaasa sinnerlugit piitsuullutik inuusut inissisimaffimminnik namminneq pisuussuteqarnerarpaat. Tamannalu ilutigalugu suliffeqanngitsut namminneq aamma pisuussuteqartut 60 procentit akissutigaat.

Steven Arnfjord Ilisimatusarfimmi inuiaqatigiit pissusiinik ilisimasaliuvoq. Taanna misissuinermi suleqataavoq, innuttaasullu taama isumaqarnerat paasissutissaatikinnerannik tunngaveqarsoraa.

Inuit atornerluisuulertarnerat suliffissaaleqilertarneralluunniit tarnimikkut assigiinngitsunik pissuteqarnerarlugu, ilisimatuunit  oqaatigineqartanerat, innuttaasut taama isumaqarnerannut peqqutaasimasinnaasut Steven Arnfjord oqarpoq.

- Aamma taamatut inissinnermut inuiaqatigiinni qaninnerusuni imaluunniit nunarsuup sinnerani tikeriaannaasumi atukkat taama ineriartorsinnaanerisa, oqaatiginissaa pikkoriffigivallaarsimanngilarput, Arnfjord oqarpoq.

Akissutit uissuummissutaasut

Kalaallit Røde Korsiata siulittaasuata, Christina Bellip eqqorneqaratarsinnaasut namminneq pisuussuteqarnerannik taama amerlatigisut isumaqarnerat uissuummissutigaa.

Kisitsisit innuttaasut ataasiakkaat akissutigisamissut sooq akissuteqarnerat ersersitsinngitsut, taavalu illoqarfimmi Nuummisut ittumi, suliffissaaleqisukeqisumi, sooq suliffissaaleqisoqarsinnaasoq paasiuminaatsinneqarsinnaasoq, taanna oqarpoq.

Qaammarsaanerusariaqarnermillu Steven Arnfjordip oqalunnera isumaqatigaa.

- Suliffissaaleqisoqarneranut inuiaqatigiinnilu atugarliortoqarneranut pissutaasut tunuliaqutaasut qanoq aaqqiiviginiarnissaat taakkualu pillugit qanoq iliorluta eqqumanerulersitsisinnaanerluta misissortariaqaripput, misissuinerup takutippaa.

Misissuineq Kalaallit Røde Korsiata nunatsinni eqqorneqaratarsinnaasut pillugit nalunaarusiortitsinerata angisuup ilagaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl