Eqqissiviilliornerit akisussangatikkaat

Københavnimi inuusuttut ornittagaata matuneqarnerata kingorna eqqissiviilliornerit akisussaqaat.

Nørrebrogade-mi pisiniarfinnut, sillimmasiisarfinnut aamma Københavnip kommunianut, aporaannerit sakkortuut kingunerinik saliisussanut millionilikkaanik akiligassiisoqassaaq.

Qaammatit marluk matuma siornatigut inuusuttut pisortanut akerliuniat inuusuttut ornittagaat Ungdomshuset pillugu akerliussutsimik takutitsipput, aserorteriffiungaatsiartumik. Taamanikkut aqqusinermi aporaannerit pisiniarfinnut Ungdomshusep eqqaaniittunut akisoqaat, ingammik taakkua sillimmasiisarfiinut.

Aserorterinernut pisiniarfinnullu matoqqasariaqarsimasunut akiligassat 2,5 million koruunit missiliorpaat, Nørrebro-mi niuertut peqatigiiffiat taama missingersuivoq. Ippassaq pisunut tunngatillugu akiligassat minnerulaassapput, tassami pisiniarfinnut aningaaserivinnullu aserorterinerit minnerummata. Kisianni Københavnip kommunianut akiligassaq kingullermerniit anginerujussuussaaq. Decembarimi aqqusinerni saliinernut Københavnip kommunia 200.000 koruuninik akiliivoq. Maanna saliinermut atugassat amerlanerujussuussasut tamakkuninnga isumaginnittoq Kim Jørgensen oqarpoq.

- Massakkut salitassaqarnerujussuuvoq aamma illoqarfimmi eqqissiviilliorfiusut amerlaneroqaat aserukkallu ingasanneroqalutik, Kim Jørgensen oqarpoq nangillunilu:

- Kingullermik 40.000 koruunit angullugit saliinermut atorpavut, massakkut saliinerinnarmut 400.000 koruunit atornissaat naatsorsuutigaarput. Saleereerutta aqqusernit aqqutigineqarsinnaasunngorteqqissavavut allagartalersorlugillu, eqqaavilersuilluta iikkanilu allaasakkat piiarlugit, Kim Jørgensen naggasiivoq.